香港科技發展與地緣政治

見到好多人攞匯豐喺新加坡搞AI呢單嘢嚟講。

講到香港科技唔掂，唔知點解所有人都有一大堆真知灼見，諗到乜就踩乜，超多專家。同佢哋講其實香港技術嘅底子冇大家想像咁差，唔知點解會好似得罪人祖宗十八代咁，所以都費鬼事講太多真心話。

由頭到尾香港嘅問題都係地緣、政治、同埋地緣政治。同人係冇關嘅，同政策都冇關。第一，係規模問題。經濟規模唔夠大，係養唔起高科技公司嘅。而家啲科技巨頭直接被稱為「hyperscalers」，可見呢樣嘢已經算係常識。香港雖然財經方面好國際化，但喺其他地緣嘅層面卻係同世界各大市場有相當大嘅差異，歐美固然遙遠，同中國都係有層隔膜。香港嘅 startup 只能 scale 到 700萬人嘅市場規模，然後就要國際化。唔係話唔得，不過美國嘅 startup 唔搞國際化都可以成為獨角獸，成件事就差好遠。

香港嘅仲有第二重規模問題，就係人才太少。而家啲成功科技公司郁啲就幾千人，而呢啲幾千人係世界各地嘅頂尖科技人才嚟。香港一年有幾多個 STEM 嘅畢業生？呢樣嘢本身大國係有優勢，不過啲咩矽谷等等之類呢幾十年嚟累積埋另一個優勢就係除咗本國人才仲有無數咁多技術移民。簡單講即係我如果壇生意搞得成功，可以輕易高薪挖角，只要俾得起錢就一定會請得到人。 呢個問題真係好嚴重嘅，如果有人問我，喺香港搞間 100人規模嘅科技公司應該係請到人嘅；但如果喺香港搞間 1000 人規模嘅科技公司，我真係唔知可以點搞。冇就係冇，而家先至生仔嘅話，起碼廿年後先有貨。完全冇解。

政治問題就好易理解：香港(以往)係國際資金走入中國嘅踏腳石。不過中國嘅科技生態自成一國（防火牆乜乜乜，內捲乜乜乜），自從 Google 出走、Meta 舐完一輪都入唔到去之後，都冇咩邊間外國(互聯網)科技企業真係成功入到中國。唔諗住做中國生意就自然唔使揀香港，喺新加坡搞亞太總部起碼可以試圖舔埋東南亞啲生意。

最近講 AI 就多咗啲地緣政治問題。主要係美國制裁中國啲 AI 嘢嗰陣好興順手 ban 埋香港。呢啲係香港人共業嚟，不過本老師我罪業就比一般市民深重咗啲。呢條因果鏈係由本土派講 Hong Kong != China 開始，去到 2019 年壇嘢，去到啲國安法s，再去到外資怕咗你直接當 Hong Kong is China，然後最後香港官員去美國解釋其實 Hong Kong is not China (經濟方面)。喺某啲關鍵位，本老師牽涉嘅因果都真係比較重。最後結果就係，無論 Nvidia 晶片定係 OpenAI/Anthropic 嘅 AI 模型，香港都係享有同中國一樣嘅待遇，可謂求仁得仁。所以本老師係有少少罪業深重，呢篇文係告解用嘅，唔係mansplain用嘅。

至於呢啲問題有冇得搞？梗係冇啦。

「凡是有的，還要賜給他，使他豐足有餘；那沒有的，連他有的也將從他那裡被拿走。」(Matthew 25:29)

呢個年頭《基本法》乜乜乜，我都費事講咩一國一制融入大灣區去解決呢啲地緣同政治問題。以《基本法》嘅講法，起碼去到 2047 先可以傾呢啲嘢，到時世界變成點都唔知啦。

---

不過話時話 (都係忍唔住要得罪下大家祖宗十八代)，香港啲大學嘅 AI 論文輸出其實唔太差。偶然𥅈下啲論文都會見到港大科大 etc 有份。輸出量應該係高過星加坡嘅。當然，啲作者梗係「內地譯音名」啦。但呢個年頭，美國啲AI都係「內地譯音名」人做，正常現像嚟，唔好大驚小怪。