信心不足，必然絕望

十幾年前，受到香港之魂感招，做過幾年「先知」，參與過「傳道」工作。呢種工作主要目的，當然係對廣大社會帶嚟正面影響，而唔係為咗私利。

有人會以為網絡世代，呢種先知傳教工作同KOL無異。表面上係似。但有一個好重大嘅分別：KOL係有得睇KPI嘅。一般嘅KOL無非係sell自己，或者幫其他人sell嘢，喺網絡年代，大把數據，大把方法追縱受眾嘅反應，大把 feedback。幾多 click、幾多 share、幾多 sales 即時有得睇。

但先知係冇 feedback，亦都冇 KPI 睇嘅。例如話，你提倡大家應該做 XYZ。幾年之後，大家真係做緊 XYZ。唔通本老師真係 又中？但係，你永遠都唔會知 XYZ 同你有冇因果關係。究竟你係9up撞中，定係成功預測未來，定係真係憑一人之力影響咗未來？冇得證驗。 當然，正所謂「成功不必在我」，最後 XYZ 真係辦成，都算係一個 happy end。好多相對小嘅事，只要你先知力足夠，都可以迎來 happy end。因為十年八載，係等得到嘅。雖然你唔知個結果關唔關你事，但你都可以照樣打下飛機自high下。

但，好多時，撒出去嘅種籽，真係要幾十年甚至更長久嘅時間先至開花結果。好多人努力幾年見唔到成果就開始感到無力；如果有生之年都見唔到成果，應該如何面對？點樣知道自己努力做嘅嘢仍然有意義？點樣避免陷入迷失、沮喪、絕望嘅困境？

答案係信心(faith)。呢種信心，同平時講嘅信心有少少分別。通常講信心，係有統計學支持嘅，例如你練習某種技能，越係熟練，信心就越大。呢種信心係講緊以過往成績推斷未來成功嘅機率。我哋講嘅信心，當然係冇往績或數據支持。信心係來自神聖嘅認知(divine knowledge)，可以話係超然於物質。來自神聖嘅認知呢樣嘢，係先知就自然會有，唔算得係好特別嘅嘢嚟。但點樣分辨自己係有信心嘅先知，定係患有妄想症嘅自大狂呢？呢個就關乎修行。修行嘅目的，基本上就係為咗擺脫「小我」嘅干擾，等自己可以更準確咁理解天道，或者另一種講法係接收神嘅訊息。

亦唔係話接收神嘅訊息就一定啱，一定可以準確預測未來幾百年嘅因果。結果未決定之前必然係未知，而我哋正正係參與緊做決定嘅過程。所以信心嘅來源，唔係對未來確實嘅預測，而係對天、地、人嘅理解，明白自然(I am)之道。所謂自然，係萬物率性而行，冇所謂善惡。善惡係「小我」嘅產物，所以先前話係干擾。只要唔俾「小我」審判善惡，就冇所謂嘅結果嘅好壞。萬物率性自然，先知亦唔例外。所以信心係源於對天道自然嘅信心，換句話亦即係對神嘅信心。

「我」之所以唔係神，係因為「我」嘅人格令我唔知道未來最終嘅結果。不過正如上面所講，一切率性自然，結果冇所謂好壞。之所以安於結果，係因為有神聖認知嘅「我」嘅決定，亦即係神嘅決定。對神嘅信心，亦即係對神嘅決定嘅信心，亦即係對「我」嘅信心。

有咗呢份信心，就可以遠離一切絕望。