「啱」嘅感覺
人與人之間嘅溝通主要係透過文字、圖象、聲音等等嘅媒介，但大前提係雙方事先已經清楚知道呢啲媒介嘅符號代表啲乜。例如我寫「蘋果」，或者用「🍎」嘅圖象，我係假設你已經見過蘋果，大概應該都摸過、聞過、食過。如果你本身唔知蘋果咩係，就咁透過一般嘅媒介好難解釋。
所以一般嘅溝通模式係所謂「客觀」嘅，冇得傳授主觀感受。客觀溝通係建基於大家都對事物有大致一樣嘅主觀理解。有種講法係，古時因為日常生活冇乜「藍色」呢樣嘢，以前啲人形容藍色嘅嘢嗰陣亂晒龍，甚至會懷疑佢哋係咪「睇唔到」藍色。（以前藍色顏料好貴，唔似現代用化學方法可以輕易整到出嚟）
以前嘅人因為平時有機會見到藍色，分唔到藍色，但佢哋未必知自己分唔到。我懷疑現代人（即係我哋在座各位）都有類似嘅盲點。當然唔係顏色嘅盲點（不過本老師天生色弱 T^T），而係其他主觀感受。
現代社會係好 overwhelming 嘅，資訊大爆炸，由細個開始社會就夾硬揭開小朋友嘅腦夾硬塞一堆嘢入去。呢個過程一般去到廿幾歲先開始減少，然後人去到三十歲就開始覺得自己已經學識咗好多嘢，個腦變硬，蜕變成為老屎忽。
呢個現像未必完全係壞事，始終現代社會流通嘅資訊係經過千錘百煉而成，雖然未必啱晒但絕大部份都有一定嘅道理，如果一個年輕人完全唔接收呢啲訊息係冇可能喺現代社會正常運作嘅。正正係因為社會上流通嘅資訊 太過有用，好多人係冇機會學習點樣分辨一樣嘢係啱定錯。
我敢講，絕大部份人（係，包括你）都唔知咩係「啱」或「錯」。（就算我自己 理論上 好清楚個結論係乜，實際上都係半信半疑。）
重要嘢要講多次：絕大部份人都唔知咩係「啱」或「錯」。
以前啲人會信權威，例如社群領袖、老師、宗教；之後有咗印刷術，啲人開始信書本。去到 21 世紀，伴隨住科技嘅發展，呢個 confusion 達到空前嘅高度。大部份人覺得 Google 返嚟嘅答案可以用嚟判斷對錯。（AI 信唔過吖嘛，要用 Google 確認先得㗎。） 我都幾肯定過多幾年，社會主流會覺得 AI 話啱就啱。
某程度上，以上嘅權威都係可信嘅。「客觀事實」本質講緊只要參與溝通嘅人都認同一樣嘢，嗰樣嘢即係事實。所以只要個權威真係權威（而每次問相同問題都會俾相同答案嘅話），佢必然可信。出事嘅位係當唔同嘅權威俾唔同嘅答案嗰陣，大家無辦法達成共識。（唔好以為呢種「共識形成嘅客觀事實」會輕易俾真實世界嘅現像否定，推翻既有共識係一種極度困難嘅工作嚟，我哋接觸開非唯物主義嘅都好清楚呢樣嘢。）
當啲嘢無法輕易達成共識，我哋可以互相討論。正所謂「真理越辯越明」，透過各種形式嘅討論，共識可以慢慢形成。大家最熟悉嗰種討論方式係學術用嘅所謂理性討論，嘗試用理性嘅框架等大家達到一致嘅結論。好多人會將呢種理性嘅框架攞咗去作為判斷事情啱唔啱嘅「程序」，進行一種「自我討論」。嗰啲數學證明、邏輯、分析哲學之類就係用呢啲方法判斷對錯嘅。
以上係一般人對「啱」或「錯」嘅理解。
上述嘅理解唔係「錯」嘅，不過留意返全部都係社會嘅建構(social construct)。如果社會唔存在（或者變成另一個完全唔同嘅社會），呢啲嘢全部灰飛煙滅。「啱」同「錯」係形而上(metaphysical)嘅概念，照計唔應該同某個時空入面某個社群嘅主流意見綑綁。
所以，如果冇晒上述嘅社會建構，剩低啲咩呢？冇權威、冇共識、冇討論，甚至「自我討論」都係假嘅 （因為係從「自己」度爆啲分身出嚟，啲分身都係一種社會建構嘅投影）。一個咁 barebones 嘅世界究竟有冇「啱」同「錯」？
「啱」係有嘅。我年半之前有篇文《所有嘢都係啱》，而家睇返我都唔知內文嘅解釋係咪有用，但「所有嘢都係啱」確實係宇宙嘅一個大秘密嚟。所謂嘅「錯」係我哋 cosplay 出嚟嘅嘢。（「錯」呢個概念關乎「我」同「非我」嘅形成，有啲棘，大家唔係想做神就未必需要明，講住咁多先。）
所以只要你認同「啱」係一個社會建構以外嘅形而上概念，咁就真係每個人自己話係就係嘅嘢嚟。當然，定義「自己」好難 (Lau, 201X)，喺呢個「太極生兩儀」嘅漩渦入面點樣捉拿到真正嘅「自己」係有少少技巧嘅。
所以終講講到個主題喇。喺社會建構以外嘅世界，其實係得「自己」。「自己」同「世界」嘅連繫得一個「界面(interface)」，就係主觀感覺。
所以，
「啱」係一種主觀感覺嚟。
「啱」係一種主觀感覺嚟。
「啱」係一種主觀感覺嚟。
正如「戀愛嘅感覺」一樣，「啱嘅感覺」唔係每個人都可以經常體會到。我哋日常生活入面太過依賴其他基於社會建構嘅方法判斷對錯，所以一般人甚少會用到「啱嘅感覺」。好多時人講「我覺得呢樣嘢啱」其實都唔係真係「啱嘅感覺」嚟。就正如「戀愛嘅感覺」一樣，被以為係「啱嘅感覺」好多時係摻雜咗其他嘢，例如貪婪、妄想、恐惧、Ego，以及各種喺社會上吸收返嚟嘅期望，大概可以簡稱為「偏見」。（其實呢個位直接套用佛家講嘅「貪、嗔、痴」就啱。）
本身「啱嘅感覺」係好輕盈嘅，通常一閃即逝。所以喺冇「偏見」嘅情況下，「啱嘅感覺」先至會比較可信。若果未體驗過，一般人可能好難捕捉，我懷疑係有少少熟能生巧嘅。
呢樣嘢就係文章一開始所講，主觀感覺好難透過文字傳達。何況呢個唔係五官感之一，而係所謂嘅「第六感」。不過既然大家知道呢樣嘢存在，可以得閒留意下。