時代嘅魔法

古代文明理論上科技冇咁先進，但好多文明都留低好宏偉嘅遺蹟，例如埃及金字塔、萬里長城、吳哥窟 etc etc

究竟啲資源喺邊度嚟，你固然可以從經濟方面去解釋，話某某時期某地區可以產生若干糧食，支撐到幾多百萬人嘅經濟，所以有個強而有力嘅中央集權政府嘅話，應該都可以完成嗰啲大型建設項目嘅。

吹就係咁吹。實際上冇人見過啲賬目，就算見過都只能夠講句：嗯，啲數字加起嚟好似都啱嘅。

---

20世紀係發展大型基建嘅年代。

去到 21 世紀，明明所有技術都進步咗，但，對好多「先進」地區嚟講，啲資源(eg. 錢)就唔知去晒邊。啲政府s負債高，起條橋下下都億億聲，好多既有嘅基建項目連翻新嘅資金都唔夠，最多只係維持基本嘅保養。

我其實係覺得好奇怪，唔明點解會搞成咁。

當然你仍然可以對住啲經濟數據同賬目，將啲數字加起佢，再講句：嗯，啲數字加起嚟真係冇錯㗎。

但無論你點用啲數字去解釋都冇用，最後個結果就係，人哋古埃圾幾千年用 presumably 原始技術可以砌到個金字塔出嚟，而喺 21 世紀好多所謂先進國家嘅政府連起條橋都冇錢。

可能有人會話，政府冇錢係因為啲錢去晒啲有錢佬個荷包度嘛。咁 Elon Musk 有冇錢起條橋？（ehh 應該有嘅） 但佢起唔起到個大金字塔？萬里長城？ (侵侵發夢都想喺美墨邊界起個萬里長城，不過睇個勢佢哋最多都係整到啲「牆」，城就真係唔會整到喇)

---

現代人成日覺得呢個時代先至最先進，以前啲人必然係落後，起碼科技同經濟一定係差過而家。

有時啲人會解釋話某時代係獨裁社會，資源往政府中央集中，所以表面睇好似好勁，但實際上經濟冇咁好。呢個可以係事實嚟嘅，但望返而家所謂 late stage capitalism 好似同獨裁嘅結果冇乜分別，貧富之間嘅差距都係大，然後 Elon Musk 仍然係冇能力砌個金字塔或萬里長城出嚟。(佢淨係買Twitter已經損手爛腳。而Twitter物理上係咩嚟？只係一堆唔係好值錢嘅server…)

我唔係話呢個時代嘅技術同經濟真係比上個世紀差。每個時代好似係有唔同嘅產物，例如21世紀出產嘅係 data，最後促成 AI 嘅誕生，呢個係我哋呢個年代嘅一大成就。或者如果我哋所有人放棄上網，全民走去做建築工人，可能真係會起得到好多金字塔同萬里長城⋯⋯ 但呢個「如果」係冇可能，你俾多幾多億出嚟都唔會有人做呢樣嘢，因為錢唔係重點，重點係如果我可以上網覆下email畫下公仔就夠三餐溫飽，點解我要幫人起金字塔？？？

所以喺呢個年代，我覺得我哋(整個地球)嘅社會雖然「真係先進咗」，但亦都真係起唔到金字塔，起唔到萬里長城。甚至起條橋都越嚟越難。

---

所以咩係「時代嘅魔法」，我諗我想講嘅係，某啲特定嘅時代，係可以好似魔法咁相對容易整到某啲嘢出嚟。過咗個時代，就算科技先進咗，人口多咗，社會富庶咗，都未必可以重複返以前啲人好似好容易咁做到嘅嘢。

至於係咪真係有「魔法」在其中，我覺得要睇下你信唔信啲數字加埋條數係啱⋯⋯ 你可以話冇理由唔啱，但呢啲真係純粹睇你啲 prior beliefs 係乜。如果你啲 prior beliefs 係包括五餅二魚呢類故仔，咁其實個時代有超越數字嘅 buff 係一啲都唔出奇嘅嘢。我個理論係如果要發生啲唯物主義解釋唔到嘅嘢，一係小規模咁做，靜靜雞收埋唔好俾人知；一係就大規模複雜到冇一個人可以理解成件事，咁就唔會「穿煲」。唔穿煲就冇矛盾。