算命

點解算命會準？

睇住啲神棍s喺網上互咬，感覺係幾微妙嘅。 (小二！俾多碟鹹脆花生！

話說點解算命準，一般解釋係歸結於算命師傅犀利，而好多小棍棍s就因此自我膨脹，睇唔起人。但常言道「解釋就係掩飾」，所有嘅「解釋」都只係呈現片面真相，信到十足嘅話你就太天真。

【占卜】呢個過程入面有三個參與者：「問卜者」、「占卜師」同「應驗結果嘅天地萬物」。占卜係呢三者互動嘅過程。將靈驗嘅結果全數歸功於占卜師個人嘅能力，可以話係無知且狹隘。例如我可以解釋話結果靈驗係因為問卜者「咁啱」搵到個會講啲準確結果嘅師傅；又可以話係天地萬物刻意成全。不過比較全面嘅講法係「天、地、人共同合謀策劃去演出一場精彩嘅故事」。宇宙萬物本來渾然一體，我將其切割成三份都純粹係為方便解釋（所以「解釋就係掩飾」係真理嚟，好似係）。

我哋倒反轉頭再諗深一層，就知道點解占卜靈驗唔係只係占卜師嘅個人能力：大部份做呢啲嘢嘅，平時都係普通人，會迷惘，會失意，會遇到挫折。卜占嘅過程必須係有人問有人答，喺呢個過程裡面，占卜師先至會係占卜師

再俾多個角度大家參考。話說最近好似有唔少人開始嘗試搵AI去算命，都好似準準哋咁。唔通AI又係有神通，天生異稟，得到高人指點？

「命運」改唔改變到？

「命運」改唔改變到？個答案係好小學雞嘅，純粹定義問題：話明係命運(fate)，就梗係改變唔到。 比較有趣嘅問題係，你點樣會知道「命運」？占卜？通靈？定係從過去發生嘅事去推斷未來？ 大家都知呢啲嘢唔係100%準確，正所謂「投資涉及風險，過去業績並不代表將來表現」。至於點解，就關乎一樣我稱之為「自由意志」嘅嘢。

「自由意志」係我哋身處呢個宇宙時嘅法則。背後機制係「未知變成知嘅過程」。「未來」之所以係「未來」，係因為佢「未知」。當你知道嗰陣，嗰樣嘢對你嚟講就已經發生咗。(留意喺貝氏定理當個prior係100%嗰陣，冇任何證據會改變到佢。[另按：呢個世界係冇真正意義上嘅所謂客觀事實]) 其實一般人所謂嘅100%肯定，通常連99.9%都冇。

所以「命運」有幾真純粹係睇你覺得佢有幾真。「命運」的確係可以靠「自由意志」去改變嘅，當你仍然覺得嗰樣嘢喺「未來」、「未發生」，咁就代表你俾咗機會自己否定呢個「命運」嘅真實性。

話係咁講，但喺呢個世界，行動係真實想法嘅證明。如果原本嘅所謂「命運」係根據過往嘅事嘅軌跡推斷出嚟，而你行動上唔作出相應嘅改變，咁件事都好大可能發生。始終坐喺度9諗唔係好work。