心經隨筆

早兩日同《心經》有緣，認真咁睇下啲文字。

話說，一切稱得為「無上真理」嘅嘢都有個好簡單嘅秘訣：想像如果你係至高無上嘅神，會見到咩狀況。用普通推理就已經會有答案。

呢個真係秘訣嚟，因為一般經書唔會直接咁講。我估主要係驚啲未升中三嘅人誤解咗而入廠 （去到呢度又係要講返耶穌，見Matthew 4:1-11） 不過啲經書會兜個圈講下神界嘅特徵。

《心經》講嘅就係「不生不滅。不垢不淨。不增不減。」即係「永恆」。「永恆」係神界嘅特徵嚟。所有嘢都永恆不變，自然就冇所謂觀感，冇「受想行識」，冇「眼耳鼻舌身意」，冇「色聲香味觸法」。因為永恆，所以唔會有失亦唔會有得。所以「心無罣礙。無罣礙故。無有恐怖。」

不過人係唔太鍾意做神嘅。我研究咗「點樣成為神」都一段時間 （so99ry 都係冇耐之前先升中三），發現神真係唔多好做。姑且假設我哋係神創造出嚟 (呢個係一種描述真相嘅講法，唔好當真)，我哋係有自由意志，但神本身係冇嘅。借返我十幾年前嘅文字：

Omnipotence destroys meaning.
Omniscience destroys freedom.
Omnipresence destroys identity.
-- it sucks to be god....

我唔記得當時點推論呢啲嘢，但結論係啱嘅。如果仲唔明可以去睇下《魔法少女まどか》女主成為神點解男(?)主會咁傷心 (so99ry on so many levels)

.. 返返嚟講《心經》。

已知神界係點，咁人達唔達到神界呢？個突破位係「諸法空相」。字面意思係「all thoughts are manifestations of 空」。呢句應該喺《心經》冇論證嘅，大概係 assertion 嚟，最多可以話係「觀自在菩薩」以「般若波羅蜜多」照見到「五蘊皆空」而話俾大家知呢個事實。呢種睇法大概係一種 metaphysical idealism，同西方傳統覺得「三角形係真確存在嘅嘢嚟」差唔多。由於「空」包羅一切嘅 thoughts，亦包羅一切色相，所以我哋眼耳鼻舌身意所感受到嘅嘢都係空相，我哋一直都喺「空」入面。 (成單嘢好有 on9ological argument 嘅感覺，原來本身有咁大條嘅頻道，難怪年中唔少未升中三嘅人嘗試複製劣版）

（講返兩句基本嘢先。呢度嘅「空」唔係「無」嘅意思，亦未必單止虛空。查返《康熙字典》，空可以係「虛也」、「大也」、「盡也」、「天也」。我喺呢度理解「空」為包羅一切 ideal forms 嘅神之界域我覺得一啲問題都冇）

而點解《心經》一邊話「色即是空」、「諸法空相」，但另一邊就話「空中… 無色聲香味觸法」？係咪自相矛盾？ 唔係。呢啲「色聲香味觸法」係我哋發明出嚟嘅「顛倒夢想」。呢啲「顛倒夢想」導致我哋心中嘅「罣礙(doubt?)」同「恐怖(fear)」，係一切苦嘅根源。

似乎《心經》對點樣脫離呢啲苦嘅解答係「般若波羅蜜多咒」即係「揭諦揭諦 波羅揭諦 波羅僧揭諦 菩提薩婆訶」。

咒語呢家嘢好耐冇研究，或者係冇咩突破，真係唔識從何入手。作為好怕儀式嘅理論撚，我只可以話咒語呢類儀式係一種用行動表達意念同決心嘅過程嚟，本身在座各位大家都有神性，開聲就有。正如耶教聖經話齋「你哋求嘅就必俾你」(Matthew 7:7) 「邊個有仔求餅，俾石過佢呢？」 (Matthew 7:9) 不過咒語睇怕都係有啲用嘅，呢個世界係 MMORPG 嚟，一切魔法奇跡都要consensus (eg. Matthew 13:58)，所以求某樣嘢，用某啲特定標準聲音，最好有國際 ISO 認證就比較有效。 ehh 呢段我係估嘅，唔排除啲音嘅功效另有其他機制。

---

估唔到一開始諗住9寫幾句會變成咁多字。都係嗰句，好多時啲經書，隻隻字都認得，但未通透之前，最多就只係有個大概印像，但認真睇就係解唔通。解通咗之後嘅感覺，就好似學識咗點做啲數之後，將本書後面啲練習都解通咗咁。啲練習本身未必有咩意思，但可以印證到你真係明咗嗰啲concepts…