「犧牲就係意義」修正版

「犧牲就係意義」作為一條公式暫時都好似冇咩證據話佢錯，但其實我一直都覺得有少少衰衰哋，始終鼓吹「犧牲」好似有啲問題。直至最近學識咗原來問題係在於我從來都冇考慮過其實「意義」係唔需要苛求嘅，只要無求就唔需要「犧牲」。

某程度呢種講法仍然走唔出我九年前寫嘅《正念、執念、妄念、FF念》，但當年我私心仍然係覺得「意義」較為崇高，所以冇刻意提醒返大家其實呢樣嘢係 optional 嘅。甚至可以話，一切皆空，眾生皆苦，殘酷對待自己去追求啲「空」嘅嘢其實唔係咁建議。

當然大家有自由意志，本身條公式係冇倫理內涵嘅，只係show條路出嚟等大家自己揀。應然同實然之間嘅鴻溝究竟係點處理，大概係宇宙最深難題之一，每個人都有自己嘅答案，喺呢個議題上我都未敢走出嚟做大家嘅本老師。

話雖如此，但我都想提醒返大家，令世界變得更美好其實未必真係需要各種血腥同暴力。由於最高階嘅魔法係自然完成，學老子話齋，感覺就好似唔使出力、冇人做過任何嘢咁，啲嘢就自然搞掂咗。有啲人會因此周身唔聚財，所以好多時啲人硬係要搞啲大龍鳳出嚟，擦下存在感。世間一切作為其實都係呢類嘅擦存在感，純粹係我哋覺得好似做啲嘢有付出有犧牲有儀式感先安落，但其實呢啲嘢根本冇必要。

明咗老子講緊乜之後，睇住世人不斷將「努力」抬到去道德嘅雲端，會有種阿茲特克人牲嘅既視感。雖然現代社會講「努力」最多只流汗而唔流血，但時間就係性命，將時間當做祭品其實係一種分期付款嘅人牲，喺我眼中唔太值得吹捧。唔係話冇效，而係講緊，就算你明知古代巫術進行人牲有若干法力，你係咪真係覺得應該做先？我諗大家棘住嘅位係唔明白「努力」同「阿茲特克嘅人牲」係同一樣嘢以唔同形式嘅表現。

至於點解最高皆嘅魔法係自然完成唔使點出力，其中一個解釋就係，當你嘅意志同整個宇宙係一致，咁自然水到渠成；相反，若果你嘅意志同宇宙相違，你係用緊個人嘅力量對抗宇宙，互相抵磨，自然出力多而功效小。當然啲嘢點樣 align 又係要睇返上面所講嘅宇宙最深難題，我冇乜罐頭答案，so99ry。顯化呢家嘢我淨係知道發動條件，但唔知點樣達至發動條件。最多只可以贈大家一句：中二病(ego)係修行嘅最大障礙。