所有嘢都係啱

係，所有嘢都係啱。呢個係存在嘅本質，亦係呢個世界最重要嘅秘密。

我哋固然可以攞盤(國際)象棋出嚟，黑白分明咁樣玩遊戲，但遊戲始終係遊戲，現實中無所謂勝負，無所謂是非，無所謂對錯。

好多人聽到「所有嘢都係啱」會覺得不可思議，難道唔使講邏輯？唔通可以 1+1=2 同時 1+1=3 ？

但好多人唔知邏輯系統都係遊戲嚟，遊戲嘅規矩可以打破。 Lewis Carroll 喺《What the Tortoise Said to Achilles》就已經將呢件事演繹得好傳神。建議未睇過嘅朋友讀一讀佢先 （篇文好短，放心）。

如果隻烏龜話：我唔理你啲狗屁邏輯，我話 1+1=3，亂鳩咁嚟，你可以點應付？係咪 Achilles 一槍打死隻烏龜，佢就啱晒，隻烏龜就錯晒？

事實上，人類「證明」其他人錯嘅終極方法只有一個，就係將唔跟規矩嘅人殺死。否則，其他人鍾意諗啲乜，講啲乜，做啲乜，你都係冇得「證明佢係錯」。[1] 除非你殺死佢，令佢冇得繼續做「錯」嘅嘢。

所以最關鍵一環就喺呢個位：究竟死亡存唔存在？

如果死亡存在，並且「死」就係代表「錯」，咁我哋可以推論，因為大家遲早都會死，所以 #所有嘢都係錯 嘅。

由於「所有嘢都係啱」，所以上面嘅推論係啱嘅。你認同嘅話就係啱。不過我本人覺得「所有嘢都係錯」好麻煩，反正我未死住，都唔知死亡存唔存在，所以選擇「所有嘢都係啱」好似比較開心啲。(但「所有嘢都係錯」都好重要，得閒再深入探討)

我同意呢樣嘢對普通人嚟講係非常難接受。邊可能所有嘢都啱？但只要你認真將「錯」呢個概念追根究底，就會發現所有嘅「錯」，都係起源於某種死亡嘅威脅。衰嘢就廢事講太多喇，不過可能要指出大部份人所謂「是非對錯」嘅概念，都係來自童年嘅Stockholm syndrome。

所以，只要你否定死亡，唔驚死，我可以向你人格保證，你所有嘢都係啱。

---

[1] 所有「證明」都係啱嘅，「XXX係錯」都係啱嘅，但問題係「XXX係錯」係啱，唔代表 XXX係錯⋯ (唔明？即係你冇睇《What the Tortoise Said to Achilles》