人做決定之前，係唔知自己會做咩決定

image

由於我比較蠢同埋缺乏想像力，我已經係(起碼?)第三次嘗試講呢樣嘢。

=> 人做決定之前，係唔知自己身處一個自己會做乜決定嘅世界

呢句聽似廢話，但只要你正確咁理解佢，就可以明白點解自由意志有咁強勁嘅力量。

人做決定嗰一刻，唔單止係決定自己做乜，更加係決定咗佢自己身處邊一個世界。起碼，佢決定咗自己係存在於佢會做某個決定嘅世界。

最有趣嘅係，喺「客觀事實」角度自由意志越係唔可能，喺「主觀事實」角度自由意志嘅力量就越強大。

例如，假設科學家發明咗一個可以99%準確預測人嘅選擇嘅機器。我測試呢部機，前面有兩種口味嘅雪糕，我揀咗朱古力味。睇返機器預測，當然係一早預測我揀朱古力味。所以我嘅決定唔單止影響到我自己食咩味嘅雪糕，亦都影響住同我呢個決定有因果關係嘅嘢 (i.e. 部機器嘅結果)。 喺「主觀事實」角度，就係我嘅決定令我身處於呢部機器顯示「朱古力味」嘅世界。

(咁當然，如果做決定之前我睇到個預測，我就可以特登選另一樣嘢，去搞亂個結果。呢個係一個比較複雜嘅情況，關乎一堆正常人唔會想認真諗嘅 paradox及其解決方法s，簡單講就係部預測機器如果可以喺結果塵埃落定之前盡量與世隔絕，會容易整好多，亦會準好多。)

由於人類係社交動物，我哋通常都好在乎其他人點諗。所以由細到大我哋都被教導要尊重「客觀事實」。所謂「客觀事實」其實一啲都唔客觀，只不過係講緊其他人嘅觀點角度。我哋尊重所謂「客觀事實」，純粹係一種社交禮儀嚟，呢樣本身唔係宇宙真理。(真正嘅客觀事實係存在嘅，不過係講緊從每一個可能每一個角度出發，係神嘅角度嚟，人係好難理解。)

所以當人提出異議：「明明我望住部機器，佢一早預測咗你會揀朱古力味雪糕，然後你再揀。邊可能係你決定咗呢個宇宙先出現呀！」 你就知道，呢個角度係唔一定需要尊重嘅。想像下如果你有穿越時空嘅能力，你就係決定穿越去一個「個機器顯示你揀朱古力味」嘅時空，咁你會唔會好在意其他麻瓜講你點樣違反因果定律？

而人類係以每1分鐘/60秒咁樣穿越時空。

當大家明白宇宙渾然一體嘅事實，就會發現其實我可以「決定」「自己(身體)」做啲乜係好奇怪嘅事嚟。更合理嘅情況係： (a) 完全冇自由意志嘅決定論；或 (b) 我理論上可以「決定」宇宙任何一樣嘢 (包括身體)。

有人話自由意志其實只係幻像嚟，但就算係「幻像」之下嘅 (b)，都好似好值得探索下。