ACIM 讀後感

image

我已經唔記得喺邊度得知有呢本書嘅存在。話說呢本書嘅封面係冇作者名嘅。你去查嘅話會見到作者係 Helen Schucman，一位哥倫比亞大學嘅心理學教授。而實際「寫作」嘅過程，簡單講就係通靈。Schucman 話係耶穌同佢講啲內容，然後佢讀返出嚟錄音。之後有位 Bill Thetford 將啲內容打成文字。

呢本書嘅作者問題原來都有花生，據聞後來都打咗幾場官司[2]。最搞笑係維基入面嗰句：”For copyright purposes, US courts determined that the author of the text was Schucman, not Jesus.” :0)

嗱利申先，雖然本書喺我心目中毫無疑問係來自耶穌大佬嘅，但唔好以為佢講嘅內容同基督教教義有任何關係。事實上，據我理解，啲內容對基督教嚟講 (廣義，尤其包含天主教) 係離經叛道嘅。基督徒最好請示上級先好做任何嘢。 (不過如果你上級係耶穌就冇問題)

可能呢度嘅讀者對通靈冇乜印象，或者覺得冇可能係真。 ehh 呢啲嘢冇道理可講嘅，我只可以用人格保證呢個「現象」喺各種意義上毫無懸念都係「真」，因為我見過同體驗過。而機制係一個謎。當然聲稱通靈嘅人有真有假啦，神棍永遠都存在。不過喺 ACIM 呢個 case 就好清楚嘅，啲內容太過神奇，真係冇咩可能係有人[3]刻意借用耶穌個名嚟招搖撞騙。

話說我自己睇書甚少會攞支highlighter周圍間。但呢本書我睇咗幾頁之後發現不得了，一定要準備齊架生，逐行睇，慢慢間。睇返 ACIM 成書嘅過程，好多人都係一睇頭幾頁就發現啲內容來頭唔細，所以我點解咁肯定唔係有人攞嚟招搖撞騙，就係因為啲內容犀利到佢嘅正確性不言而喻，根本邊個寫都無關係。

如果要簡單一句概括 ACIM 嘅內容，我會形容係「耶穌用基督教嘅詞彙講佛經」。當然佛家嘅道理我十分唔熟，可能未必好貼切，但我主觀感覺的確係咁。（睇嚟我示範緊點樣一個post得罪香港兩大宗教⋯⋯)

如果大家有睇我近年啲文，都知道我探索緊啲所謂玄學、神秘學、靈性之類嘅嘢。我睇嘅嘢當然比我喺度分享嘅嘢多，始終見到好嘢係要分享嘅，唔好嘅就收返埋。外行人以為全部都係9up，但呢啲嘢雖然有唔同派別唔同傳承，去到最後啲道理係大致相通嘅，背後會有套核心邏輯，唔係隨意亂嚟。當然應該都有唔少係駁錯線，完全天馬行空，呢啲我係避得就避，所以相對遇得比較少 （但可能一般人唔識點避會遇到好多呢啲？）

Anyway, ACIM 啲內容係我睇咁多嘢入面見過最正氣最完整同埋最「深奧」嘅論述。如果魔法有顏色，佢肯定係純白色，光到掁眼。喺我認知之內唯一可比嘅，真係得佛經。但佛經啲字夾雜梵文譯音，加上年代深遠，唔係好睇得明。 ACIM 雖然係「深奧」但佢由淺入深、深入淺出，睇得出耶穌大佬已經好盡力將啲概念講得淺白。除咗啲英文風格略嫌老土之外，可以話只要你肯睇多幾次，始終會明嘅。(所以點解要攞highlighter慢慢間，就係覺得遲早要由頭睇多幾次⋯)

image

實際內容呢，大概就係：你睇，你以為係真實嘅世界，咁多苦難、死亡、離別，難道你真係好想要呢啲咩？其實一切都係虛幻，係「你」製造出嚟嘅幻像，好似發緊一場惡夢咁。只要屏除幻像，真相自然會浮現，就可以從惡夢中甦醒。（真係唔似佛偈咩？我已經唔係特登用佛經嘅詞語…)

至於點解上面嗰幾句要用六百幾頁紙去解釋， ehhh 我都唔知，但我可以講嘅係 (1) 入面嘅「廢話」唔多，內容係緊湊濃縮嘅； (2) 你可能以為攤長咗應該好淺，但我係一路睇一路心諗：嘩屌講到咁撚深嘅⋯；始終「解構」呢個世界實在唔容易，當大家都深信呢個世界係「真」嗰陣，又相信呢個世界只可以接受生離死別各種苦難，咁耶穌大佬都只能夠長氣少少講下點解真相唔係咁。

一個比較個人嘅得著就係一路睇一路印證我對於「魔法」[4] 理論嘅猜想。有好多我之前都喺度寫過分享過，都唔係啲好特別嘅嘢，但如果之前冇接觸開嘅，ACIM 可能有啲位會比較難理解。佢唔係用術語 (例如「XXX法則」)，但字裡行間會用啲同類嘅邏輯，熟悉嘅一眼會睇得出，但唔識嘅睇多幾次應該都會 get。由於我近排諗緊呢堆嘢，所以會有個幾有趣嘅現象就係有時我嗰排諗緊乜，咁啱睇到本書又講啲類似嘅嘢，又或者啲內容引導我諗某啲嘢，然後再睇多兩頁就見到佢果然講嗰樣嘢。有少少「互動內容」嘅感覺，幾得意。

由於本書我足足(斷斷續續)睇咗半年，如果有人問我印像最深刻係乜，我真係唔記得答唔到，只可以由頭再望下 (所以間咗highlight咗打咗粒星嘅位就好有用喇…)。我只可以話內文最後嗰幾個 chapter 啲概整合總結嗰下，真係十分之發人深省。(最發人深省嘅部份應該係最「離經叛道」嘅部份，哈)

話說，呢本書有網上版本嘅，八卦想望下嘅可以上網搵下先，唔一定要買。不過認真讀嘅話最好都係有啲工具去mark低啲重點同筆記。本書真係唔易讀（真係唔係我廢）。不過聽聞就算明唔晒都唔緊要 (我自問都明唔晒) ，後面有啲每日練習，望落去幾簡單嘅。

暫時諗到係咁多。有興趣嘅不妨交流下，唔知有冇興趣嘅都可以搵我問下嘢。（利申我興趣主要係魔法理論研究，冇咩興趣幫人賣書或「傳道」。）