【故仔】

雖然我喺臉書偶然會分享我啲所謂「魔法研究」心得，但其實我近排睇嘅嘢遠比喺度寫嘅嘢多同廣，有時係諗到啲嘢想講，但又會刻意避免擺上臉書。固然係唔想俾人問「你講緊表演嗰種魔法定係神棍嗰種」 XD ，但另一個考慮係，好多時大家唔識點接收啲資訊，好易出現誤解。

現代人好鍾意將事物分成「真」同「假」，呢個 model 對處理「非唯物主義」嘅嘢好容易會出事。理由應該有好幾個層面，粗略講其中一個層面，大概係慣咗用客觀事實去諗嘢，轉換成主觀事實嗰陣就會好易搞亂個世界觀。(Equivalently, the frequentist does not adjust well to radical Bayesian thinking…) (2024年4月後補：其實可能關鍵在於非唯物世界冇客觀唯物世界嘅 dualistic/dialectic nature，是非冇分得咁清)

其實我自己都係一個受「客觀事實」洗腦嘅普通人，個腦構造同埋思想(壞)習慣應該同常人冇咩分別。所以我都要用某啲手段去將我接收到嘅訊息消化。而我嘅解決方法，就係將 所有嘢 當係故仔咁聽。

重要嘢要重複：將 所有嘢 當係故仔咁聽

同一件(客觀)事(實)，你叫十個人講返出嚟，好多時真係會有十個版本。真相係咪只有一個？喺小說入面就係，喺客觀事實嘅框架就係。但喺主觀事實嘅框架，過去同未來都係不確定嘅[1]，而現在你未知曉嘅嘢，都可以係不確定嘅。每個人身處嘅時空唔同，所認知嘅嘢都唔同，所以每個人嘅主觀事實都會有啲唔同。咁邊個先「啱」？理論上正確答案係：「對每個人嚟講，自己嗰個都一定啱」。每個人都有自己嘅真相，其他人講嘅嘢，就只能夠係故仔。

當然，人係社交動物嚟，所以如無必要，都唔好由得主觀事實同其他人嘅差得太遠。進入咗單機模式走唔返出嚟，唔好彩就會入咗精神病院。非唯物主義嘅訊息尤其容易令人中招，因為基本上可以靠主觀事實邏輯推論人會因此得到某種改變世界嘅「神力」。啲睇唔透嘅人好容易開心過頭，以為有得玩 God Mode 就應該去盡，尤其係冇傳統宗教約束嗰陣，係特別易中招。呢啲 大概係 同俗稱「走火入魔」嘅嘢差唔多啦。關於呢個話題我都係未明得透徹，所以都係照舊講返耶穌：據基督教聖經，耶穌喺沙漠修行嗰陣，受到魔鬼誘惑，話佢可以利用佢嘅神力去變啲食物出嚟，去煉成不死身，去統治整個世界。細個聽個故仔嗰陣，係冇諗過原來每一個發現自己有「神力」嘅人都會經歷過呢啲掙扎，一個唔小心又係青山病房見。(你明點解啲嚴重精神病人好興覺得自己係耶穌未？) 就算你唔係 literally 相信自己係神，只係嘗試動用啲「神力」去促進啲唔大唔細嘅事，唔知點解聽聞都好似有高機率係會搞到自己行衰運，表徵就好似係用晒啲運氣之後就倒霉咁。都係嗰句，我未明得透箇中發生咩事，只係想提下大家，傳說中有啲咁嘅事 (而我冇興趣為大家負責)。

我懷疑因為本身啲「冇(近似)客觀真相」嘅嘢啲概念未”crystalize”(?)，啲主觀事實嘅描述s就可以diverge得好緊要。啱啱諗到個比喻，就好似 github 啲 PR 未 merge 入 main branch 咁樣，唔同嘅人望住自己條branch會見到啲唔同嘅嘢。(唔係IT9嘅可以想像你同幾十億人一齊寫緊一篇小說，每個人都努力寫最新一章嘅情節，希望被收納入「共享嘅正文」，然後大家投票決定喺「共享嘅正文」嘅故仔入面採用咩情節。咁未經大家投票確認嘅draft，就係啲可以diverge得好緊要嘅嘢。[2])

所以用非唯物主義嘅方法去嘗試搵冇客觀真相嘅嘢嘅答案嗰陣，聽返嚟嘅嘢真係只可以當係故仔。故仔未必係真，亦未必唔真。聽咗就係聽咗，切忌嘗試去「信」(或「唔信」) 佢。講到尾，人自己知嘅嘢就係知，唔知嘅嘢，夾硬嘗試判斷佢係真或唔真，雖然對一個被客觀事實洗腦嘅人嚟講係會比較安心[3]，但就會好易偏離真相。(好彩就係，跟住大隊咁錯，其實冇乜相對一般人嚟講好差嘅後果。呢個係「fact check」嘅偉大之處…)

雖然我確實係重點想講其他人嘅主觀事實只可以當故仔咁聽，但都想順便講埋，其實所有望落去好似係客觀事實嘅嘢，基本上都係故仔嚟。簡單如「I go to school by bus」都係一個故仔嚟，又例如「秦始皇統一天下」又係一個故仔嚟，同「我今日食咗炸雞」一樣都係故仔嚟。都係你永遠冇可能確認佢真定唔真，所以唔好嘗試去「信」或「唔信」。從來講故仔都唔使係真先可以講，所以啲資訊用得著就可以攞去用。反而係以為自己講緊「客觀事實」嗰啲就要小心啲，因為所有嘢都係故仔嚟，所謂「客觀事實」都唔例外。

  1. https://hnfong.github.io/public-crap/writings/2015/%E6%99%82%E9%96%93CM%E4%BF%82%E7%8F%BE%E4%BB%A3%E6%96%87%E6%98%8E%E5%98%85%E7%94%A2%E7%89%A9.html
  2. 呢啲嘢如果搞過 distributed systems 會容易好多…
  3. 任何話你聽有方法判斷事實真偽嘅權威都係權威嚟，而權威都係由佢自己嘅主觀事實所構成，唔係你嘅主觀事實。