孔子嘅姓氏

早兩日碌臉書見到有條片，喺街上周圍問路人「孔子姓甚麼？」 有人答「孔」，有人答「子」，有人答「唔知」。

呢個問題係少少搞笑嘅，因為封建時代姓同氏係兩樣唔同嘅嘢嚟，如果喺街上有問我呢個問題，我可能都只能夠答「唔記得」。上網查返，孔子姓子，子姓係因為佢係宋國公族後裔(亦即係商朝國君後裔)，孔係佢嘅氏。

我忽發奇想：「孔」呢個氏係幾時開始用，點解用「孔」呢？ 然後就搵到啲好有趣嘅嘢。

孔子祖先第一個同「孔」字有關嘅人物係叫 孔父嘉。但孔父嘉 唔係 孔氏，「嘉」係名，「孔父」係佢嘅字。根據周禮，諸侯嘅五世子孫都算係公族 (《禮記．王制》：諸侯五廟)，而孔父嘉係宋前閔公嘅五世孫，孔父嘉個仔係六世，所以要起返個氏。 (《孔子家語．本姓解》：五世親盡，別為公族。故後以孔為氏焉。) 當老豆叫「孔父」，個仔用「孔」為氏好似都講得通。

我本身懷疑係咪「孔父」決定個仔係孔氏先改個咁嘅字，但又唔多似。一來佢哋都好興叫「X父」，例如孔父嘉個老豆叫「正考父」，個仔叫「木金父」，個孫叫「祁父」，所以應該唔關事；二來，我好奇個「孔」字點嚟，查下《說文解字》講乜，竟然有段咁嘅神奇嘢：「孔，通也。从乚从子。乚，請子之候鳥也。乚至而得子，嘉美之也。古人名嘉字子孔。」

「古人名嘉字子孔」 :O ！呢個有少少「香港人名嘉雯字Carmen」嘅神奇感覺。係咪鳩噏呢？又真係唔係。我喺網頁度仲見到段玉裁嘅【說文解字注】話：「楚成嘉字子孔。鄭公子嘉字子孔。春秋經宋孔父，左傳云孔父嘉。」我查返好似都啱啱哋⋯⋯ (起碼啲keyword喺同一段文字入面見到) 只能講以前啲人真係好得閒⋯⋯。

咁但係「嘉」字同「孔」字有咩關係？網上亂咁查，見到疑似有「嘉(甲骨文)=生仔」一說。睇返之前《說文》話「乚，請子之候鳥也。乚至而得子」，所以「孔」字都解「生仔」。所以「名嘉字子孔」就好似解得通，名同字都係講生仔！

然後孔子後人又確係不枉「孔 ＝ 生仔」，真係子孫不絕，而家去到第八十代。話說中國人嘅族譜通常都唔多靠譜，不過孔子嫡系嘅族譜因為有政治重要性，經過歷代政權驗證，應該係幾真。

---

無聊中嘅無聊

雖然「孔子」姓「子」，但「孔子」入面個「子」應該純粹係尊稱嚟，唔係好似西人咁將「姓擺後面」。但古中國有冇姓擺後面嘅例子呢？又真係搵到有。女性就係咁。例如周幽王寵愛嘅褒娰，「娰」就係佢嘅姓。我以前以為個「娰」有女字邊旁因為佢係女人，但原來唔係。例如宋國公族女就係叫「X子」。《左傳．隱公元年》：「惠公元妃孟子，孟子卒，繼室以聲子，生隱公，宋武公生仲子，仲子生而有文在其手，曰為魯夫人，故仲子歸于我，生桓公而惠公薨，是以隱公立而奉之。」所以呢，「孟子」係魯惠公正妻 :) (唔知呢啲嘢同日本女性叫「X子」有冇關呢…)