讀書

(寫於2023年7月)

見臉書同IG啲中年人士興致勃勃講DSE，我又順便感慨兩句。

其實我係個超級唔鍾意讀書嘅人。

唔知我係咪特例，我工作開心過讀書好多。其中一樣嘢就係，「學生」係冇放工嘅，理論上 課餘時間都應該做功課，溫書，直到每科都有信心滿分為止。從來都唔會有師長同你講「你考到80分夠㗎喇，放心去拍拖啦。」

咁啲時間點取捨好呢？要取捨就要權衡利弊，究竟係做愛做嘅事，定係為咗某啲目的屈就去做唔太想做嘅嘢。不過，讀書真係唔知讀嚟做乜，所以我最後係放棄：如果同目標無關，學唔返、功課唔做、書唔溫。（去到後期，啲同學都知我淨係有 pure maths 堂先返學⋯）

另一樣讀書令我好唔慣嘅情況就係，讀書嗰陣要溫習嘅科目少則四五，多則八九，點樣分配時間都係完全冇指引。最慘嗰樣係學校通常係「唧牙膏」咁上課，一日講四五科唔同嘅嘢，每堂講少少，到喉唔到肺，基本上完全唔俾時間空間機會學生深入理解啲內容。溫書考試講究效率，但咁高效率，又係為咗啲乜？又係返返原本嘅問題。

好多人大義懍然咁樣講讀書好高尚，為學做人乜乜柒柒，但明眼人都知強制教育只係資本主義社會嘅職前培訓，講究嘅嘢係跟規矩、服從指示；而高等教育好多時都係用金錢換取社會地位嘅交易嚟。大學畢業有咩咁巴閉？好多大學畢業生連year 1教科書啲基本嘢都唔識/唔記得，唔好講而家大學學店經營模式底下啲教授都唔多敢fail啲水準唔達標嘅學生。

呢個年代真係要學習嘅，網上大把資源，質素比一般學校嘅好好多，亦都可以深入好多。周圍同啲學生講讀書考試好重要嘅人，一係見識淺薄，一係存心呃鳩人。做人最緊要都係知自己想要啲乜，考試都係為咗實踐自己嘅目標，唔係為咗其他人硬塞俾你嘅所謂意義。

咩DSE、ABC搞到人咁大壓力好多其實都係無謂嘅。呢排我都不斷諗緊，現代人咁大壓力，主因都係自己內心深處睇唔起社會上某啲所謂失敗者，繼而接受唔到自己變到好似啲失敗者咁樣。如果自己心入面冇呢啲高下之分，世界或者就會豁然開朗。