點解中國人住嘅地方樓價咁貴？

一個地方嘅經濟發展得好，一般人生活嘅需求被滿足，咁剩低啲錢攞晒去做啲乜？

冇錯就係投放落去「資本」去搵更多嘅錢。但「資本」係抽像嘅概念，好似股票、債券、業權，呢啲都係啲好概念上嘅嘢。實際上啲錢係去咗邊？你可以好玄咁講句「一切皆空」，但呢啲資本唔係(全部) turtles all the way down，去到最後總有部份其實係同現實世界有關嘅嘢。

的確部份資本係「一般人生活需求」嘅嘢，例如糧倉入面裝滿白米都算係「資本」嘅一種，但因為糧食相對價格太低，通常糧倉最值錢嗰part係塊地。

點解樓價越嚟越貴？因為地產唔同一般嘅 commodities，冇得靠經濟效益量產減低成本，反而因為人口密集嘅地方嘅土地係得咁多，個 supply 好 inelastic (應該係，唔熟書)，所以地產同樓價會不段咁升。

退一步講，當除咗住宿之外生活必需品都好平，究竟啲所謂資本家仲有咩方法迫到你努力工作呢？冇錯就係唯一一樣量產唔到 (而啲資本家又控制住) 嘅嘢：土地。

如果上面所講嘅嘢係啱，照計喺自由市場冇奴隸制度之下，樓貴嘅現像應該全世界都發生先至係，但點解中國人嘅地方特別嚴重呢？

可以望下美國，佢哋啲城市雖然都有樓價升得快過人工同通漲嘅問題，但係為咗層樓煩惱嘅人卻係相對少。反而好多人係俾各種債務纏繞大半世。印像中最常聽見嘅係學生貸款、信用卡數之類。

所以上面講嘅嘢唔啱㗎其實，資本家除咗將樓價推高迫你班賤民努力工作之外，仲有一招叫做渡你吸毒上癮然後賣毒品俾你。只要社會上大部份人有毒癮，而資本家控制住啲毒品供應，咁就唔使推高樓價㗎喇。

美國嘅 consumerism 就係呢種玩法。其實都係打開口牌㗎喇，中國咁多年嚟拓展咩「內需」咪就係想將經濟慢慢轉型去美國嗰套，靠消費嘅癮繼續推動經濟。唔係嘅話，啲錢擺喺度冇掟使，最終都係去晒地產度，樓價其實點搞都係會係咁標高。(所謂「躺平」現像咪就啲人係向經濟毒品say no，但自己又冇想追求嘅意義咁)

我覺得人類去到「有錢冇掟使淨係識推高樓價」呢個位，其實都要認真諗下究竟搞經濟發展仲為咗啲乜。唔搞經濟嘅壞後果好明顯，就係會冇錢冇生產力打WW3。不過撇除呢啲on9理由，仲有咩原因？ 某程度上真係有種「為勞動而勞動然後證明自己有勞動過所以值得喺社會生存」嘅意味。

人類喺呢幾百(/千?)年嘅經濟發展同經濟理論嘅環境下已經唔記得咗點樣用「你(父母)勞動咗幾多？」以外嘅方法衡量人嘅價值，經濟發展到生活所需大部份都有齊嘅時候，反而迷失自我。

所以我喺私人臉書度話「思考人生意義諗到點解樓價咁貴」，就係當大家喺搵錢以外冇咩存在意義嘅時候，啲錢就會去咗證明自己有努力搵錢。

咁係咪吸「消費者主義」毒會好過「躺平」？事但啦。