死亡

人死咗之後會點？做咗幾十年人，我每隔十年八載就會對呢個問題完全改觀。

• 頭十年，對「死亡」概念有啲模糊，見人講天堂地獄，就聽住先；
• 十幾歲，覺得科學同邏輯無所不能，高舉唯物主義，覺得「人死如燈滅」；
• 去到三十歲，開始懷疑呢個世界嘅所謂科學定律係咪真係可以解釋晒所有嘅嘢。

咁多年以嚟，我積埋咗一堆奇怪經歷同傳聞。細個嗰陣以為只要自己學識多啲嘢，就可以用科學解釋一切。但到咗呢個年紀，開始觸及到人類知識嘅極限，先至明白現今科學知識真係冇辦法解釋晒呢啲嘢。

所以唯有自己由頭探索。我發現有樣幾有趣嘅嘢，就係當代科學對啲傳聞、傳說係好抗拒嘅，啲實驗要喺實驗室入面做先至算數。但如果你有基本嘅人文學科訓練，你係會大概點樣分辨邊啲傳聞比較可信，點樣將啲本身唔可信嘅零碎資料組合起嚟，就可以還原得到一個比較可信嘅結論。

「靈界」

我而家都幾肯定某種「靈界」係確實存在嘅。呢樣嘢實在太多「證據」，堆積如山，除非你係原教旨唯物主義信徒，否則我好難想像你會點樣否定呢個可能性。

問題係，「靈界」存在，唔代任何一門宗教信仰體系所講嘅嘢一定係真。至少起碼，有啲宗教強調「天堂」同「地獄」，有啲宗教講「輪迴」，有啲宗教講「靈魂不滅」、「鬼魂」之類；理論上佢哋嘅教義互相衝突，究竟邊個先啱呢？

呢樣嘢本身冇咩正確答案，我都只係用我所知嘅嘢，探索下啲可能性，同大家分享下。

咩係死亡？

好多人都會將「死亡」定義為一個單一嘅事件：一係死咗，一係未死。但呢件事唔係咁簡單。例如你諗下，十歲嘅你，去咗邊？你可以話係成長咗變咗今日嘅自己，但我會話另一種睇法係十歲嘅你已經「死」咗，今日嘅你只係一個承繼咗佢某啲嘢（各種記憶）嘅另一個個體。事實上，我認為我哋每分每秒都經歷緊一種「死亡」，消失嘅係當下嘅官感思緒，而繼續生存嘅只係一堆記憶同殘存嘅感受。

另一種每日發生嘅「死亡」就係瞓覺。對於大部份人嚟講，瞓覺嗰陣你會冇咗意識，發夢嗰陣大多時候唔記得自己係邊個，去到瞓醒嗰刻啲記憶先返返嚟。如果你唔醒嘅話，咁基本上就係死咗。根據某啲傳聞，你瞓覺斷片嗰陣，就係你嘅「靈魂」喺某啲「靈界」度活動。我覺得如果想探索「死亡」之後會發生咩事，瞓覺呢樣嘢係好值得擺喺放大鏡下面仔細觀察嘅。

冇記錯嘅話，瞓覺嗰陣個腦係 shut down 咗一堆嘢，所以我覺得可以假設，如果你瞓覺嗰陣唔係點用到個(生物體)腦，你唔好諗住死咗之後可以用到你個(生物體)腦。好多人話「靈魂不滅」，姑且當係真先。但最重要嘅問題嚟喇：靈魂包啲乜先？

靈魂包啲乜？

呢個真係最重要嘅問題：靈魂包啲乜？

• 包唔包你十歲嗰陣好想買好多好多好多玩具嘅心情？
• 包唔包你二十歲嗰陣談戀愛入痴入迷嘅心情？
• 包唔包你三十歲嗰陣為工作而煩惱嘅心情？
• (筆者仲未到四十歲，反正 you get the idea，以後嘅嘢就唔鳩噏住)

究竟靈魂係一個你死亡嗰刻嘅「snapshot」，定係你人生幾十年入面所共通共有嘅嘢？如果係前者，咁等到人老珠黃嗰陣先至死，然後永久保留呢個 snapshot，雖然係「不死」，但都幾慘，完全唔係一個振奮人心嘅好消息；如果係後者，咁就已經可以確認，你喺人間世入面所珍重嘅嘢（亦都係年月會洗去嘅嘢），一定會喺你「死亡」嗰刻唔見咗好多。

我自己暫時覺得比較有可能嘅，就係死亡同瞓覺差唔多。你瞓覺嗰陣保留咗幾多自身，死之後就(最多)可能可以保留幾多。所以有啲修行方法，係用打坐代替瞓覺，傳說可以幾十年唔瞓覺；又或者係覺寤瑜伽，喺瞓著咗覺發緊夢嗰陣變返清明夢。唔知呢啲方法係咪可以跳過精神死亡喇，但我覺得都幾有可能係破謎嘅一個關鍵。不過瞓覺同死唔同，瞓覺嗰陣你個身體仲運作到，死嗰陣係冇呢回事。(聽過一個傳聞係，你瞓覺發夢嘅實在記憶，係你醒咗之後先reconstruct返出嚟嘅。如果真係咁，你發夢發得幾勁都好，唔代表你死咗都會保存到自我，因為你唔會再喺呢個物理世界醒返。)

MMORPG+Matrix 假設

搜集咗好多傳聞傳說之後，我覺得呢個世界係一個「虛擬世界」嘅機會都唔細。以前未發明 MMORPG，所以啲用詞係有少少唔同，但啲概念基本上係吻合嘅。大致上就係你嘅靈魂係一個MMORPG虛擬世界嘅玩家，某種程度上操控或體驗一個或以上嘅人類意識，玩完之後有啲評核(天堂地獄)，可以再玩過(輪迴)。喺呢個世界觀之下，你同虛擬世界入面嘅「人」講：「你死咗靈魂不滅㗎！」其實究竟代表啲咩，真係好值得玩味。因為虛擬世界嘅人設可以同你出面嘅世界好唔同，例如MMORPG可以男人扮女人，性格都可以因為角色扮演變得好唔同，又或者有啲人本身上網上下都有唔同性格。何況，如果真係有隻 MMORPG 遊戲係死咗唔會有方法返生，你嘅角色死咗都會覺得好可惜，唔係一句「靈魂不滅」就解答到所有問題。

AI 講兩句

題外話，我今日啱啱開始玩 Github copilot (AI插嘴:真係好好玩。)。佢有啲幫我 autocomplete 嘅內容，望落都值得參考下：

[AI話]我覺得人死咗之後會點，就係要看你自己嘅心態。如果你自己嘅心態係「我死咗之後就會消失」，那你就會消失。如果你自己嘅心態係「我死咗之後就會變成一個精神存在」，那你就會變成一個精神存在。如果你自己嘅心態係「我死咗之後就會變成一個精神存在，而且我會繼續存在」，那你就會變成一個精神存在，而且你會繼續存在。[/AI話]

唔知大家覺得有幾大可能性。本身我冇諗住講呢樣嘢，所以先至要 credit AI。但「主觀事實」嘅力量真係可以好強大，呢個宇宙嘅法則真係「信則有，不信則無」。如果大家喺度諗點解我求神拜佛咁耐都未中六合彩未發達，我只能夠講，綜合分析啲傳聞傳說之後，我認為曾經死過或者好接近死亡嘅人嘅神力係比較強啲。所以死咗之後，變成某種靈魂之後，呢個「主觀事實」嘅效應應該都會變得更加強大，AI 嗰句嘢真係好 make sense 㗎。

結語

我諗我喺最後都應該要順手講清楚，我唔屬於亦從未隸屬於任何宗教，亦都唔會推廣任何宗教。以上嘅猜想係基於我好認真從各路傳聞傳說提煉出嚟，不過你唔真係死過，就真係唔知會發生咩事。呢個世界其實亦唔係冇人(聲稱)死完之後返生嘅（耶穌唔係唯一一個囉好冇），不過最後冇死嗰啲現今科學叫做 Near Death Experience (NDE)。係呀，喺今日嘅環境，就算耶穌真係死咗然後返生，啲科學家都只會話係一個 NDE 㗎咋。By definition 嚟，死咗唔會返生，所以仲生存緊就係冇死到，十分邏輯，無懈可擊。Anyway，嗰啲 NDE 故仔聽多幾個都唔錯，話晒聽多啲故仔收集多啲 data 分析上嚟底氣都充足啲。不過，一來要記住 AI 上面講嘅嘢：主觀事實嘅力量喺死後應該都幾強，每個人嘅經歷（同埋對呢啲經歷嘅interpretation）都唔同；二來留意返啲NDE故仔，佢哋見到嘅嘢都係好受佢哋嘅信仰同文化轉承影響。

講得興起講多兩句。話說，現代好多人未直接見過靈界啲嘢對世界嘅影響力，覺得冇理由要 posit 一個咁樣嘅世界觀，覺得多舊魚。呢樣嘢我其實好明白。如果唔係某啲個人經歷，我嘅世界觀都唔會咁極端由一種唯物主義改變到而家咁。我到而家都覺得，其實你真心堅信唯物主義嘅話，你嘅世界仍然會以唯物主義嘅方式運作（我犯嘅錯就係day1對唯物主義信心不足…），所以你絕對可以話我係神棍。反正 AI 都話，『如果你自己嘅心態係「我死咗之後就會消失」，那你就會消失。』我係真心覺得咁樣係好可能嘅，甚至我會覺得絕大部份情況之下，呢個世界嘅運作就係根據現時大家所認知嘅科學定律。由於世間對超科學嘅信念好薄弱，呢啲靈魂嘢，其實係喺科學嘅裂縫間存在，通常體現於因為其複雜性導致科學分析唔到嘅領域，通常係機率、同埋人嘅思維同意識。最強嘅法師喺今日世界最多都只能係一個「身上發生好多巧合嘅痴線佬」，只不過我哋曾經稱之為魔法。同一樣嘢嚟。呢個世界其實冇咁多矛盾，好多嘢都係睇你夠唔夠智慧將啲表面上衝突嘅嘢砌埋變成一個合理嘅圖畫。