無題
以下係隨意寫嘅抒情文，講下投資嘅心路歷程。冇咩重點，不過我估啲內容係有啲有用資訊嘅。
最近發現，坊間流傳最廣嗰啲投資策略，尤其係讀正經書正經課程學嗰啲，基本上都係唔係好適合用嚟投資自己嘅錢。一個普通基金經理要考慮嘅嘢，主要唔係回報率有幾高，而係點樣保住份工。客人係好現實嘅，贏錢唔會多謝你，輸錢就會屌你十八代祖宗同埋攞錢離場，所以相比起賺錢，基金經理諗嘅嘢係點樣減低蝕錢嘅可能性。記住「蝕錢」係相對嘅，如果大市跌咗 10%，你只係跌咗 8%，咁就冇咩嘢；但如果大市升 10% 你只係賺到 8%，咁同蝕錢冇咩分別。所以對一般基金經理最緊要嘅嘢就係有得同人交待，盡量唔好跑輸個市，其他賺唔賺都係其次。
明咗呢一點，我就終於明白點解啲人會講分散投資、講modern portfolio theory、教人跟風買啲高風險低回報嘅嘢：分散投資追逐小利，好彩嘅話可以養一個基金經理十年八載，長遠係咪最好嘅投資策略唔不在考慮之列；而管理自己嘅錢係講緊超長線投資嘅增長，根本唔係同一種玩法。
我唔係想引出「唔好買基金，月供 ETF 算啦」呢個結論。雖然呢樣嘢係一個適用於大部份人嘅「結論」，但問題係個結論係點嚟先？
一個濕鳩基金經理未必好叻，但佢話晒都係全職管理資金，所以除非你係天才，否則想要有超出於一般基金、超出於大市嘅表現，理論上就要全職去深入研究市場上嘅選項、日日睇實個盤。假設一個叻嘅人全職工作值年薪 60 萬咁先算，再假設你叻到可以跑贏大市5%，咁你要有1200萬本金(=60萬除5%)先至值得全職去睇住盤數。有幾多人會揸住千幾萬流動資產呢？有幾多人會有佢年薪20倍嘅流動資產呢？所以對大部份人嚟講，搞咁多嘢嚟真係嘥氣。我諗起早排慕名買咗 Ben Graham 本 《Intelligent Investor》，諗住睇下佢講乜。睇咗頭幾章，佢話佢用呢啲方法投資，比其他專業投資者多幾個(~3?)%嘅回報⋯⋯我心諗：屌你(?)呀？搞咁多悶嘢先多幾個%，咁我不如撈多份part time算啦！ 最後我棄咗書⋯
咁所以係咪應該「月供 ETF 算啦」呢？老實講，我自己從來冇試過咁做。一個好絕望嘅真相就係，只要你有啲資產喺度，無論你做乜，包括月供 ETF，包括揸現金，都係「主動」嘅投資嚟。月供 ETF 基本上就係買緊某個地方未來經濟發展，而「經濟發展一定係向上」呢樣嘢，喺歷史上從來都唔係必然。先唔好講日本個市自90年代到2010年跌足二十年咁嘅特例，淨係望住香港恒指呢十幾年嚟浮浮沉沉都足以令人懷疑人生啦。記住，呢啲已經係冇打仗冇核爆嘅先進經濟體系：放眼世界，有啲國家破咗產，有啲國家貨幣變廢紙，有啲戰禍連連；你有本事早幾年揀啱咗買 NASDAQ ETF 你咪威囉，但你既然識講你月供 ETF 係睇長遠回報，你係咪真係知道二十年後呢個地方唔會核爆唔會打仗呢？去到呢個位，你要考慮嘅嘢已經同炒股冇乜分別。
所以點解我一開始就講啲基金經理點投資，因為「學投資」最易學到就係嗰套。個人經驗嚟講，最伏嗰樣嘢係「分散投資」，因為投資任何嘢你都要理解佢本身係咩嚟，有咩風險同回報。如果你只係投資兩三樣嘢，咁你只需要認識嗰兩三樣嘢係咩嚟；如果你學人「分散投資」，又股又債又金又銀又期貨，基本上咩都要識，咁你不如認真考個 CFA 算。但最吊詭嗰樣嘢係，啲嘢其實係分唔開嘅，你唔識晒佢，好多時係睇唔明事態發展。(上個月啲銀行爆煲嗰排我唔覺意學識咗央行嘅基本運作…)所以呢啲真係 first world problem，你唔肯「信」其他人管理你嘅資產，就只能夠自己學，多勞多得(?)。不過你幾叻都好，都只不過係比其他人賺多幾%，如果你本金冇八位數，係咪真係稱得上係「多勞多得」真係好值得斟酌。
某程度上「學投資」呢樣嘢都係一種長線投資。雖則話你資產冇年薪十幾倍唔值得花太多時間炒股，但「學習」本身都係有價值嘅，而我最近發現，長線價值投資係真係好靠經驗。呢度嘅「經驗」係綜合性嘅認知，要靠喺社會打滾過先明嘅嘢，例如各行各業嘅生意點做、管理層諗嘢嘅模式、牛市熊市啲人嘅心理、自己面對危機嗰陣嘅心理反應，各種各樣垃雜嘢，知己知彼，當然都包括「炒股」嘅經驗。你冇呢啲經驗，係冇任何理性方法 calibrate 對自己投資眼光嘅信心，盲中中用唔到 Kelly criterion，唔知單一項目最盡可以賭幾大。結果，嘻嘻，就係返返去「分散投資」。所以，講到最後，呢啲入門功夫雖然真係廢，但俾新手練功唔錯，起碼唔會搞到你輸身家，同埋迫你學齊晒所有大路嘢，等你攞夠經驗值，日後唔會有太多嘅盲點。等你神功大成，就可以好似巴菲特咁樣，揸住十隻八隻主要股票，hold 幾十年，抛離大市一大截。
我以前會有另一種疑惑，就係所謂嘅 “efficient market hypothesis”。我作為投資者有咩優勢可以贏到市場上其他人(包括好多專業金融才俊)呢？正所謂知己知彼，知道市場上大多數對手諗緊乜好重要。佢哋諗緊乜？咪就係上面所講，點樣同投資者交代，點樣蝕少啲錢。投資自己錢唔使同自己交代點解今年underperform咗3%，點解要買ABC唔買XYZ，係一個好大嘅優勢嚟。只要係自己錢，無論你啲投資睇起嚟幾咁無厘頭，都唔使同其他人交代，某程度上係多咗好多「偏門」機遇可以把握（我諗起塔巴好似講過有個舊同事碌爆晒啲信用卡買期油，諗住贏咗就退休，輸咗就破產咁上下…）。另外，由於每個基金經理都要刷表現證明自己存在嘅價值，所以係唔會有真正嘅長遠投資。所謂「價值投資」點解可以有望高於大市嘅回報，係因為只要你真係揀啱策略（或值得長線投資嘅公司），市面上同你一樣玩長線嘅競爭對手相對較少，而長線策略亦都可以減低你需要投入嘅時間（買咗長揸唔太需要不斷做功課），所以呢啲策略比較適合用嚟投自己錢。前提係你要準確咁估算自己投資眼光，夠膽應用 Kelly criterion，集中投資長期揸住。雖然咁講好老土，但「知己」真係最難，其他嘢都只係花時間就學得識嘅技術嘢嚟。
講咗咁多，咁即係點？其實真係睇你想點。我懷疑可以整返個問卷，填完答案之後就可以俾返啲投資方向嘅建議，例如：
- 你係咪月光族，冇多餘嘅錢可以投資？
- 係 => 收皮啦死窮撚
- 你係咪好憎諗關於錢嘅嘢，唔怕每年貢獻 1.x% 俾啲金融才俊基金經理？
- 係 => 不妨睇下你銀行 sell 你啲乜就買
- 你係咪好憎諗錢，但又唔想俾人賺你錢嘅 cheap 精？
- 係 => 估下邊個國家三十年後經濟仲係好發達，搵佢最大嘅 ETF 月供
- 你係咪有幾十萬以上嘅閒錢，唔怕平均每日花起碼半小時跟財經新聞，睇年報，睇住個市？
- 係 => 咁你自己學投資啦，不過要預咗頭幾年嘅回報計返時薪係唔值你所花嘅時間
- 以上皆非？好簡單啫，聽老母講，買返兩層樓就啱㗎喇。供樓係人生意義嚟，唔係咁辛苦搵咁多錢嚟做乜？又食唔到咁多嘅，係咪咁講？
題外話講下點解呢個世界得一個股神巴菲特。點樣成為股神？好簡單幾個步驟 （以時序同難度排列）：
- 學識有效嘅投資策略 (難度：☆☆)
- 靠技術同運氣賺到幾億身家 (難度：☆☆☆)
- 賺到幾億身家之後仲唔退休，繼續投資，精益求精，乜你人生除咗炒股冇其他意義㗎咩？ (難度：☆☆☆☆☆)
- 八十歲唔退休，仲好生猛 (難度：☆☆☆☆☆☆☆☆☆)
- 九十歲都仲唔退休，都仲好生猛 (難度：☆☆☆☆☆☆☆☆☆☆☆☆☆☆☆☆☆☆☆☆☆☆☆☆☆☆☆☆☆☆☆☆☆☆☆☆)
通常一般人最多去到第二步，我諗我自己都係。