點樣搵男女朋友

好啦我就認真講下。利申：一般人唔使諗到咁複雜，呢個純粹係偽學術討論。

「搵男女朋友」基本上上就係茫茫人海搵個互相都覺得啱嘅人嘅過程。正所謂各花入各眼，就算你客觀條件幾好都未必個個都啱：首先你要遇到個你鍾意嘅人，然後咁啱對方又要鍾意你。

所以一種睇法就係呢個係關乎「基數」嘅遊戲。你識嘅人越多，基本上搵到啱嘅人嘅「機會」就越大。「識多啲人」一定係搵男女朋友嘅先決條件。不過識人有時間成本，亦有風險，所以喺有限嘅「基數」嘅前提下，有啲人就會提倡其他小貼士去增加成功配對嘅「機會率」。

其中一種方法就係將自己變得更加「正常」。正常人嘅「市場」係最大嘅，絕大部份人只係想搵個「普普通通」嘅伴，最好比一般人「好」（eg 靚叻有錢etc）少少。就算係「好」嘅嘢都會「好得太唔正常」，例如一個男仔好似姚明咁高仲要有幾百億身家身，咁其實佢嘅「市場」肯定細過一個普通正常人，因為喺個 normal distribution 中間嘅一眾女性都會卻步。同理，啲「條件太好」嘅女性嘅「市場」都好細，唔係（淨係）因為男人唔鍾意叻嘅女人，而係只要你有任何重要嘅「條件」超過咗一兩個標準差，你嘅「市場」就會縮細。

所以坊間啲「教學」就好興教人做正常人，注意返儀容外表，同人正常交談，唔好咁多奇怪行為，總之表現到自己好正常，喺 normal distribution 條 curve #中間偏右 就啱喇。（諗到呢度我開始懷疑自由戀愛係資本主義嘅陰謀⋯）

以上係統計學嘅玩法，如果你嘅目的係增加搵到男女朋友嘅「機會率」大概冇咩錯。

但你係想「搵到男女朋友」唔係想「增加機會率」嘛！

兩樣嘢係差唔多不過係有少少分別。大家都知道表面上 0.1% 機會嘅嘢都係會發生。好多熱戀中嘅人都會話你知「遇到對方係一生嘅幸運」，即係佢哋都覺得本身個機率都唔高，但神奇嘅事就發生咗。相反，如果你好耐都搵唔到伴，你將自己「變得更正常」可以提升幾多機率呢？我估都係3%變9% 之類（有三倍呀！好多㗎喇！）。最後埋門一腳都係要靠幸運之神幫忙。你有本事由 33% 變 99% 嘅話嗰啲叫做 PUA 大師，就算呢啲物體真係存在都唔關你事（亦都唔關個主題事），唔使諗。

「將自己變正常」仲有個壞處，就係你可能覺得唔自在。好似我咁，我係幾唔鍾意望人隻眼嘅，夾硬做實得，不過唔自在囉。如果要做呢啲先有女朋友，一時三刻都仲得，但如果你係想搵個伴過世嘅，唔通勉強一世咩？（TVB嗰句「勉強冇幸福」係真理嚟） That said，如果有啲嘢你本身冇咩所謂，做比較正常嗰樣係好啲嘅，唔係叫你標奇立異（嗰啲係 PUA 玩法）

所以想搵男女朋友應該做啲咩呢？

tldr 就係佛系等運到。

重要嘢要再重複兩次：佛系等運到。佛系等運到。

係呀冇乜嘢可以做㗎。如果你係唯物主義堅實信徒，真係冇咩可以做。因為我上面都講咗，睇「運氣」（文雅啲叫「緣份」）。唯物主義係冇得「增加運氣」嘅，所以等啦。

不過如果你有啲「信仰」嘅，不妨依你信仰嘅方法誠心求下神拜下佛，可能會有啲用。

然後呢，你要體貼返神靈，因為呢個世界嘅物理因果定律set得好死，佢哋好難直接喺你間房度變個新人類出嚟做你男女朋友。聖經創世紀嘅年代就得，而家廿一世紀講科學㗎嘛，拜神都要科學少少（認真）。

所以你要做嘅嘢係盡量增加你生活中嘅「隨機性」。你生活中嘅嘢越係不可預料，咁不可思議嘅事就會越容易發生。你越係將生活嘅事設定計劃好，咁神靈（如有）就越多限制，越難幫你達成訴求。

舉個好實在嘅例子，例如你走去個相睇公司，佢問你想要啲咩類型嘅對像，你講得越多條件，咁呢個世界符合條件又啱你嘅對象就越少，神靈安排到嘅嘢就越難合你心意。當然你走去相睇講「咩都好」可能會俾人當運吉，自己執生啦。總之大方向就係，求完神拜完佛之後，最好就係信任呢個世界嘅自然會安排好，唔好自把自為將啲嘢 set 實晒，要俾機會神靈（喺唔違反物理因果定律嘅情況下）幫你「變」啲好嘢出嚟。因為，如果你唔信神靈，又覺得自己安排得好好，就唔使亦唔會走去向神靈求緣份啦係咪？

至於啲未必好唯物主義但又冇現成宗教信仰嘅朋友點算呢？（學能神教恕不收信眾）你相信自己有神力就得㗎喇，想像自己前世係一個神，不過出生喺地球被封印咗大部分能力咁。理論上一樣嘅。

完。