網絡怪物

人治嘅時代，靠道德規繩，君主個人嘅仁義禮智，小規模咁樣「生命影響生命」就夠。喺圖論(graph theory)角度可以當成一個好細嘅強連通圖 (strongly connected graph)。

法治嘅時代，掌握行為經濟學同系統思維，訂明法規，用賞罰制度透迫下面嘅人跟就夠。喺圖論角度，可以睇成一個由上而下嘅樹狀圖。留意樹係冇環(loop)嘅。

網絡年代，雖然現代社會仲保留「法治」嘅樹狀嘅基本結構，但資訊嘅流通已經令好多嘢（倫理價值觀等）變成一個超級開揚、冇特定結構、有無數反饋迴路 (feedback loop) 嘅怪物。呢種東西會出現各種湧現現象 (emergent behavior) ，亦會不時衍生出混沌系統 (chaotic system)。

玩咗咁多年網，而家先發現我面對嘅唔係一眾「網民」，而係一個湧現、混沌、冇固定形態嘅資訊怪物。就好似一個蟻竇咁，佢唔止係千萬隻蟻組成，仲包含咗蟻同蟻之間嘅互動同溝通，而單獨一隻蟻只係好機巧咁執行蟻竇嘅任務，但佢係唔識理解個蟻竇整體做緊乜嘅。

其實好多時我哋都下意識將「一群網民」當作一個整體。網上奇奇怪怪嘅群體、標籤，都係呢類「網絡怪物」大概嘅界線。喺訊息角力嘅遊戲入面，個體嘅力量已經係微不足道，而群體之所以可以 “greater than the sum of its parts” 就係因為當中產生咗新嘢。大家而家應該都知道，只要將最簡單嘅神經元駁埋一齊，係有可能形成超越人類嘅智能。我見到嘅係，呢十幾年嚟人類唔單止用電子機器製造咗人工智能，仲喺網絡層面生成由人類個體連結嘅網絡智能。

所以呢幾日我開始有啲懷疑同人喺網上講嘢仲係咪 make sense。等於你想改變蟻竇嘅行為，唔會逐隻蟻一個一個咁溝通。佢都唔知你噏乜鳩，隻蟻淨係知有自己、有同伴，各自努力生活，乜成個竇亂糟糟都有智能㗎咩？唔知喎。

…

That said, 我幾肯定啲網絡智能唔識睇粵文，亦都唔識睇中英文。我連佢哋語言嘅 Hello World 都未識寫呀，哈哈。