耶穌老師
由於從來都唔信教，細個讀經聖總以為耶穌係個老千。
而家知道世俗嘅宗教係咩嚟，就更加唔會「信耶穌」，不過偶然睇返/諗返聖經入面耶穌講過嘅嘢，重新細嚼，就越嚟越覺得佢係有啲料到。
例如我早幾年參與「傳道」工作 （文化傳道，唔係宗教傳道），諗返起「撒種嘅寓言」，就發現原來佢係講緊訊息嘅傳播要越廣越好，唔需要在意或挑選受眾，最後訊息被發揚光大嘅地方，亦未必喺你原本預算範圍（比較近似嘅現代理論係所謂「黑天鵝」）。
（而事實上基督教後嚟成為羅馬帝國國教，歐洲最主流宗教，如今傳承到世界各地，但耶穌本身係向猶太人傳道嘅，偏偏猶太人唔受佢嗰套，幾百年後俾羅馬帝國攞咗嚟用。如果早期基督教冇廣泛「撒種」嘅精神，固步自封，最後好可能被歷史淘汰。）
當然，世俗嘅教會同你講撒種嘅寓言唔會同你解釋任何嘢，甚至明明原文寫得好清晰，佢哋都會 tone down 咗，只係叫大家作為信徒就要「信」，你最好信到頭頂生幾十顆果實𠻹。呢種模糊解讀係好普遍，明明內容可以深入闡釋，啲講聖經嘅人通常都只係重覆返回主旋律：「總之信就啱㗎喇」。有時夾雜幾句講者個人對人世間道德嘅理解（通常九唔搭八）。佢哋講得多，我聽得多，自然會誤會聖經講嘅嘢係廢嘅。
對於世俗大眾嚟講，好大部份聖經講嘅嘢真係廢嘅。因為耶穌唔只係點化世人，佢係「老師嘅老師」。所以佢會用寓言去講道，預咗一般群眾唔明，但只會向小圈子（當日嘅門徒，日後世人嘅老師）解釋細節內容。事實上主流嘅基督教s所側重嘅嘢，包括祈禱、信仰、仁愛，對唔係走「老師路線」嘅普通人已經好夠。而一般人亦唔使明白呢啲嘢點解有用，的確真係信咗就夠。
我唔知啲基督教s內部點樣教呢啲嘢，不過睇返眾多歷史悠久嘅文化圈，佢哋都somehow有辦法。例如孔子老師創立咗嘅儒家思想，世俗化之後不時變成所謂「吃人的禮教」，四書五經啲內容俾人「超譯」完變咗守舊嘅思想，但真正精研儒學嘅人其實somehow都有方法傳承到孔子原本嘅精神。（我估佛家都係差唔多。）
古籍嘅原文真係好重要。雖然啲偉人通常都冇咩親筆嘅著作，但由其直接影響嘅「初代老師s」寫嘅嘢，總有一定嘅道理。而呢啲道理只要以原文（或近似原文）嘅方式流傳，就唔受後嚟世俗嘅模糊化處理，有心人應該還原得到本來嗰啲道理嘅核心。
呢啲真係「明就明」。
今年年頭又明多咗「耶穌被魔鬼誘惑」講緊乜。呢個唔係講笑，如果我早年聰慧少少，可能人生會走少啲「冤枉路」(*)，不過起碼而家(再?)踏上「主觀事實」路線，真係要不斷攞呢個故事嚟警惕自己，以免走火入魔。一般世俗人士邊需要學呢啲？世上嘅誘惑多的是，不過大部份都唔係「魔鬼」嘅引誘嚟。一般人會認為自己可以變麵包出嚟、會測試自己有冇練成不死身，會想做到世界統治者咩？唔係㗎嘛。只係自以為有神力嘅人先會出現呢啲諗法。大家讀聖經要記呢個故仔，純粹係為咗傳承啲只得極少數人如我需要知嘅嘢。除咗多謝耶穌大佬之外都唔知可以講啲乜。
無端端寫咁多字咩原因，純粹係讀約翰福音第三章有感：「乜你做老師都唔識呢啲嘢咩？」
約翰第三章講緊耶穌同友好嘅猶太教長老尼哥底母交流砌搓下。耶穌話：「風隨意吹嚟，你聞佢聲，唔知佢邊處嚟，邊處去。但凡由聖神（i.e. 靈魂）生嘅都係噉樣。」當尼哥底母「黑人問號」嗰陣，耶穌就笑佢：「乜你做老師都唔識呢啲嘢咩？」
睇到呢度忽然就好感慨。的確古今中外啲「老師」其實都係鑽研緊呢啲問題，冇其他。「教科書」唔會教呢啲嘢，就算啲小眾著作有提及，都只會係用啲隱晦嘅比喻去講（耶穌已經好直白）。我諗感慨嘅位係，雖然我係咁話呢門學問叫「主觀事實」，但似乎喺任何時空嘅合資格「老師」都會有呢啲基礎知識，側面證明真理雖然全靠「主觀」，但終點就算唔係得一個，都係鄰近嘅，大家都互相睇到對方。（孔老師點解相對弱少少，大概就係唔講鬼神。但又咁講，佢高調生活都有七十歲命，似乎都係靠佢唔講鬼。見下。）
不過若果要去到觸摸到真理嘅位置，就冇「按部就班」嘅法門，只能靠智慧同機遇。主觀事實無所憑證，因人而異，所以啲嘢講唔到。然後疑似宇宙有禁止「劇透」同「開外掛」嘅不文規則。「劇透」同「開外掛」嘅後果，淨係睇住耶穌老師嘅下場都心有餘悸。（雖然佢話係一早部署好，但佢亦都冇話唔係透過違反宇宙禁制令去達到佢嘅下場…。至於慘死對救世有咩關係，我暫時仲未完全參透得到…）你話呢啲嘢有冇證據，我只會話呢個世界冇任何人係高調開外掛而長壽善終嘅。歷史上大把各種形式開外掛嘅人，有啲「只係」天才，有啲就真係有神聖力量，通常都冇咩善終。諗諗下又諗起一個：貞德。
我諗個重點都係，大家好奇心重，靜靜雞同宇宙玩下膠，遇到同道互相砌搓下，應該都係容許嘅，所以先至會有「乜你做老師都唔識呢啲嘢咩？」嘅調侃。雖然我係咁揶揄啲世俗宗教將耶穌老師教嘅嘢模糊化，但其實偶然（通常都係紅白事）去到教堂聽耶教嘅老師（佢哋通常叫牧師或神父）講道理，其實都會有少少共鳴嘅。唔係話我覺得佢哋講嘅嘢好有道理，而係⋯⋯會有種「呀！我知你講緊乜！」嘅感覺。eh… 唔識講，大概係遇到同行嗰種熟悉感啩。
(* 理論上呢個世界上就冇咩冤枉路嘅⋯ 條條路都一樣咁直，每人每六十秒就過一分鐘。不過通俗就係咁講啦。)