愛就係

其實「愛」作為一種主觀感覺，每個人講嘅「愛」都係唔同嘅嘢嚟，本身冇咩好討論。

「#愛就係選擇」係講緊「愛」嘅客觀體現，而只有呢啲客觀現像提供共同嘅前提作為討論嘅起點。

好多人唔講「選擇」而走去講主觀嘅愛嘅感覺，講者同聽者嘅認知好可能存在好大概差異，就好似高登仔同西伯利亞人討論天氣凍唔凍一樣，雞同鴨講。

正所謂夏蟲不可語冰，好多人成世人都未遇過「愛」呢樣嘢，所謂嘅「煩惱」其實係金錢、自尊、性愛、友情、價值觀之類嘅煩惱嚟。

人嘅煩惱嘅根本原因係內部矛盾，另一種講法係「選擇困難」。「愛」之所以強大，係因為應該做嘅「選擇」清晰到容不下一絲雜念。孔子講「仁孝」，佛家講「無我」，耶教講「犧牲」，冇愛係去唔到嗰啲境界。

係，「愛」係一種同宗教信仰類似嘅力量嚟，如果你未感受到，咁即係同純粹嘅「愛」有一段距離。

不過咁講就有啲似有錢人同人講要點點點先算真正有錢，在座各位都係窮撚，好易傷到人嘅自尊心，同時似乎會吸引一堆怨念，所以平時我都盡量唔講太多。何況「有錢就解決到問題」呢樣嘢解決唔到冇錢嗰陣點算嘅問題。

唔知「世界上原來有呢樣嘢」係會令人覺得心灰意冷，定係會燃點起希望。事實就講咗出嚟。我希望呢個世界仍然係容許講事實㗎啦。