科學方法嘅限制
我一直都覺得 Flat Earth Society 好有趣。我唔知有幾多人係認真相信地球係平嘅，不過嗰堆地平說理據，對我哋呢啲痴線佬係好值得研究嘅。
理論上我哋相信科學，係因為科學理論係可以反覆驗證，唔使盲信權威。但事實上我哋絕大部份人係唔會真係走去做實驗驗證呢啲理論，就算中學上科學堂嗰啲「實驗」通常都只係大家隨便體驗下玩下，如果認真就輸了，去到最後啲真理都係教科書同教師嗰度嚟。
所以我哋相信科學，相信地球係圓嘅，唔係因為我哋自己親自驗證過，而係因為理論上任何人都可以自己驗證，所以如果真係大規模做假，只要一萬個人裡面有一個走去做實驗驗證發現唔對路，就會穿煲。
所以我相信地球係圓唔係因為我親自驗證過，而係「地球係圓」呢個理論太過出名，又似乎有唔少人親自見過圓嘅地球，牽涉咁多人，真係發現咗地球係平嘅證據而收埋唔公佈嘅機會極之細。簡單嚟講就係「唔會有咁多人一齊呃我啩！」
但事實上我哋點知呢？退一萬步講，可能我哋認知嘅世界係虛擬嘅呢？如果整個宇宙都係假嘅，仲有啲咩可以係真？呢個係 Descartes 發現嘅問題，去到最後都只能夠主觀咁相信造物主唔係騙子，冇其他方法。
所以凡事都冇絕對，就算我幾肯定地球係圓嘅，我都唔會話地平說一定係錯。因為我知道我從來冇親自驗實過地球係咩形狀，只係有人話我知地球係圓，我相信佢哋冇呃我而已。
我之前講過，現代科學專長於探索啲可以喺實驗室反覆驗證嘅嘢。但在此之外，呢個世界仲有好多知識同秘密。例如歷史人物咁，我哋認為亞歷山大大帝、秦始皇、成吉思汗存在過，係因為有遺跡、有陵墓、有記載、有傳說。就正如我驗證唔到「地球係圓」，但相信見過圓嘅地球嘅人冇呃我，我都係相信親身見過呢啲歷史人物嘅人留下嘅紀錄冇呃我，所以先相信呢啲人物真實存在過。
如果我哋拒絕認可任何親自驗證唔到嘅嘢，難道我哋要否定亞歷山大大帝、秦始皇、成吉思汗曾經存在過？又似乎唔係咁。所以主流科學其實係有雙重標準嘅，對於擺明冇可能喺實驗室反覆驗證嘅嘢，就咁算數。呢個雙重標準就係好多嘢被標籤成「唔科學」嘅關鍵：只要將啲唔認同嘅嘢歸類為「必須喺實驗室反覆驗證」嘅類別，當倡議者做唔到（有可能嗰樣嘢本身好難喺實驗室環境可靠咁複製），就可以標籤為「唔科學」，然後 case closed。
所以，科學家喺實驗室入面反覆驗證過嘅嘢，通常都係真；但在此之外 (i.e. 唔可以喺實驗室入面驗證嘅嘢) 嘅嘢孰真孰假，就唔可以靠主流科學去判斷，因為呢類嘢無法用科學方法處理，亦喺一般科學家嘅專業以外。(道理大概係，你都唔會問個科學家相唔相信秦始皇存在。)
好多人唔為意，除咗「科學方法」之外，我哋仲有其他方法去評估啲嘢嘅真偽。例如歷史學、文獻學等等都會用各種方法，用一啲未必可靠嘅資訊重新構築返一個可能嘅真相出嚟。另外古今中外各地嘅法庭，都會有一套方法去審理案件，就算啲證人講大話、刻意隱瞞、記錯嘢、誤導人等等，最後法庭都要喺呢啲雜亂嘅資訊入面得出結論。當然呢啲方法未必真係好可靠，但起碼要知道嘅係，就算唔可以用「科學方法」喺實驗室入面反覆驗證，都仲有其他手段去估算一樣嘢有幾真。而呢啲手段，喺主流科學話語權咁大嘅時候，會被好多人忽略 (起碼中小學唔會教先)。
如果我哋暫時放低主流科學嘅偏見，用返「秦始皇存唔存在」嘅方法去重新審視啲「唔科學」嘅嘢，你會忽然發現[註*]呢個世界啲怪力亂神其實可以話係鐵證如山咁滯。即係咩鬼神靈魂之類嘅嘢，證據多到好難就咁用「全部都係9up」去處理。(反而關於秦始皇啲記載就真係唔少9up….) 當然啲現象係鐵證，唔代表我哋明白究竟發生緊咩事。我呢排得閒嗰陣就喺度諗呢啲嘢，睇下會唔會有啲方法解釋到啲現像。
暫時啲思路係咁：
- 完全「客觀」嘅事實唔存在；每個人最終嘅真相都係主觀嘅；人與人溝通嗰陣用嘅觀點係所謂嘅「客觀」，但其實係 “inter-subjective”，可以想像成一種「通訊協定」，係涉事嘅人各自嘅主觀事實之間嘅妥協。
- 主觀事實嘅威力在於宇宙嘅可塑性，只要你唔「知」個事實係點，就有無限嘅可能。”Inter-subjective truth” 類同，不過人類累積嘅知識比較多，所以一個合乎 “Inter-subjective truth” 嘅宇宙相對冇咁可塑。
- 但人類始終係無知嘅。所以好多神奇嘅現象會依賴「概率」發生。所謂「概率」、「隨機」等等，從某種角度都係對我哋「無知」嘅量化。雖然係咁，神奇現象唔會以可以不斷重覆嘅方式體現 (幾乎係by definition)，你可以想像成係「為咗維持 intersubjective laws of nature」所以只能夠咁。
- 另一樣人類好難知得透徹嘅嘢，就係人類自己。呢個就可以解釋到點解咁多超自然力量係要透過人作為媒界。 我懷疑任何一個承認超自然力量嘅理論都唔可以破壞 inter-subjective laws of nature 嘅穩定性，否則倡議者就要入精神病院 (which 未必係問題，不過我未想入住)。
暫時係咁多先，就嚟寫寫下瞓著…..
[註*] 呢個係假設你有上述嗰啲文科考證訓練…