認識唔到世界嘅全貌你甘心咩？

呢個世界真係好大。

我算係學嘢學得快，同時涉獵甚廣，但掂得多嘢，就越嚟越覺得，呢個世界嘅謎團越嚟越奇幻，越嚟越難以理解。

好多人以為我講邏輯講理性就代表我係一條科學撚(有名你叫)，我雖然係對現代科學有基本認識，但涉獵嘅嘢唔會限制於主流科學認可嘅範圍。

好多人(包括我以前)會疑惑：世界資訊咁流通，如果某樣嘢係「真」，點解冇人提、冇人信？

我最近慢慢發現，原來一切都係資本主義價值觀嘅「錯」。(我都唔想樣樣都賴資本主義，但冇計..)

有好多知識，就算毫無懸念係「真」，只要喺資本主義社會「冇用」就會被遺忘。呢啲就同「追夢係onlun9，賺錢最緊要」一樣道理。大家對非主流信仰嘅印像係「邪教騙財騙色」，就係因為，如果唔係騙財騙色，你根本連佢嘅存在都唔知道。今時今日，就算耶穌降世，佢喺資本主義社會都只會係一個廢青。你識五餅二魚餵飽成村人有咩用？一次性製造食物嘅價值大概幾千蚊左右，唔好講首期，隨時連部 iPhone 都買唔到。你要喺資本主義社會立足？你呢個五餅二魚有冇得量產？點樣保證品質？會唔會失靈㗎？係咪可以全年 365 日開工？唔得？神蹟都冇L用，人哋大陸工廠每日製造緊唔知幾多億嘅食物，你規模咁細又要神靈庇佑先可以開工，不如返屋企砌積木啦。

基本上現代社會底下所有所謂嘅神通都係咁嘅下場。你同人講，人哋話你唔科學、神棍、呃人；咁潔身自愛嘅人自然收收埋埋，費事同人講惹麻煩；當然另外會有啲壞人借啲意呃人，不過講真，呃人就唔使攞真嘢出嚟啦。

所以就會有個好搞笑嘅現像就係，你如果唔係因為某種原因(eg. 親戚有神通)見過啲「唔科學」嘅嘢，就真係唔會信世界上原來真係有呢啲嘢。但你如果有緣親眼見過啲「唔科學」嘅嘢之後，就會知道啲科學撚講到世間現像被現代科學解釋得通透係一派胡言。科學家唔係萬能，啲解釋唔到就只好擺喺度攤下先，然後啲學藝未精自以為識科學嘅愛好者就會以為科學係無所不能所以解釋唔到嘅嘢就唔存在，一定係呃人。我只能夠講，現代嘅科學方法係好難研究一啲喺實驗室入面 replicate 唔到、量產唔到嘅現像。

我唔係話你事9但喺content farm見到啲咩鬼神嘢或者咩超能力就係真，斷估大部份都係吹水多。我亦都唔係話你以為見過啲「唔科學」嘅嘢就一定係現代科學以外嘅嘢嚟。你首先要真係好熟悉現代科學解釋到啲乜，然後先可以斬釘截鐵咁話「呢樣嘢真係唔科學囉」。

至於啲「邪教」乜乜柒柒，我其實唔覺有咩咩大不了。香港啲政治 KOL 不嬲比邪教更邪教，大家都習以為常，佢哋走晒去外國之後我都懶已經懶得屌 (得根叔疑似仲喺香港所以偶然要提下佢)。大部份人對「宗教」呢樣嘢嘅認知根本好膚淺，通常話得人係「邪教」就即係話「我拜嘅神有30萬like，你嘅神得49個follower？肯定係呃人啦」，呢啲論調根本就係笑撚死人(eh… 笑死我囉)。

就算講到修埋搞埋啲咩奇怪嘢有害，講真而家外國好興啲咩靜坐冥想之類嘅所謂 “mindfulness meditation” 冇返個有經驗嘅老師傍住都好易出事㗎 (詳情？我又冇科學證據，咪撚問我點解會知呢啲嘢)。基本上你唔想有風險淨係想安安穩穩咁返工供樓又想有啲宗教心靈寄仛嘅話，最好都係揀返啲行禮如儀嘅教派 (嗱呢啲就係主流宗教嘅好處)。[PS: 我認真㗎，想要長命同精神健康最好跟無神論嗰套做現充]

乖乖做資本主義嘅奴隸其實幾好，不過認識唔到世界嘅全貌你甘心咩？

至於我見過啲乜「唔科學」嘅嘢咁撚言之鑿鑿，由於有NDA喺身嘅關係，就唔方便講喇。唔係咩驚世駭俗嘅嘢嚟，情況就正如上面所講「潔身自愛嘅人自然收收埋埋，費事同人講惹麻煩」咁囉。