「俾人呃」

好多人話教育係要學識自己判斷是非，唔好盲從權威，但實際上真係做到嘅人少之又少。

事實上世界上冇咩人係識得判斷是非嘅，大部份人學識咗嗰樣係自以為是。通往真理嘅道路係充滿自我懷疑，要將事實睇得比自尊更重要。遇到認知上嘅矛盾，要勇敢咁尋根究底。（當然，啲根尋到最最最最底嘅答案係：所有嘢都冇答案，真相係主觀嘅，價值係虛無嘅，信者得救，唔信都冇所謂。）

以前偶然會有人話我「你咁樣唔辛苦㗎咩」，我總覺得好屈辱。明明呢啲先係我最鍾意做嘅嘢嚟，乜原來正常人唔係咁㗎？（人講你就信，仲好意思笑啲阿婆俾人呃晒啲退休金？） 後嚟朱生發明咗臉書，睇住啲人喺網絡發佈自己嘅狀況，先明白原來連啲所謂最叻嘅人都係人講乜就信乜嘅on9嚟。

不過，啱啱我先至話所有嘢都冇答案，信就係唔信就唔係，豈不是自相矛盾？ 是咁的，呢個世界最偉大嘅嘢就係「明知係伏都照樣衝個頭埋去」，一般人稱之為「崇高嘅愛」（按：包含但不限於愛情）。如果事後先至知係伏，咁就係 on9 喇。「知唔知」呢啲嘢本身係相當主觀嘅，不過好多人係再柒多重事後大大聲喺網上盡訴心中情話自己俾人「#呃」，咁就真係幫佢唔到。

另一樣嘢係「矛盾」。你如果係賣武器走去吹話支矛把盾點勁都冇所謂，最多俾海關周。不過如果你係整器具嘅，真心以為自己可以同時整把無堅不摧嘅矛同埋堅不可破嘅盾，咁你永遠都唔可能成功。唔好以為係少數智力未開發嘅人先會咁，我可以肯定咁講普遍大眾嘅思想矛盾之多係令我嘆為觀止嘅。都係嗰句，所有嘢都冇答案，有啲人鍾意咁樣玩，冇問題，不過太多人玩得好迫真，好努力咁向前走一步，再倒退兩步，苦苦掙扎。 尤其係呢個資訊年代，各門各派貌似權威嘅雜訊都係一 click 就有，溝埋一齊就變成一大堆自相矛盾嘅概念。

我自己近年就傾向喺思考層面解決咗啲問題先至著手行動（後生時可靠資訊唔多，要郁咗手先至夠資料去做判斷），有時睇住啲人好似好enjoy咁樣利用自由意志食屎，心裡面明知「所有嘢都冇答案，真相係主觀嘅，價值係虛無嘅」都會忍唔住喺心裡面爆一句：屌，都on9嘅。

正所謂 #關你咩事呢毒撚，近年我基本上都唔會講出聲，事但啦，開心就好，保持距離唔好搞著我就 ok。 Anyway，總括嚟講，如果你覺得自己識得判斷是非，唔會盲從權威，但又唔知我講乜，咁你應該都係 on9 嘅，多謝收看。