英國法官唔再做終審法院非常任法官

image

英國法官點解要走，唔係因為司法獨立，而係因為國安法。國安法固然衝擊普通法傳統價值，但主要問題其實仍然係外交問題。

如果真係要著眼於「司法獨立」，香港嘅所謂嘅「司法獨立」其實一早喺 2019 年 11 月損到五勞七傷。當時人大法工委就高等法院對《禁止蒙面規例》違憲嘅判決發聲明指香港法院無權判斷香港法例違反《基本法》。結果就係，自此之後，呢個「人大」嘅聲明就好似架喺香港法院頭上一把刀咁，法庭處理所有司法覆核案件都如履薄冰，甚至特登法明咗啲奇怪法律原則，將以往二十年處理覆核案嘅傳統推翻。[1]

呢個時候英國法官就冇出聲喇。反正呢單嘢都唔多關英國人事，知道利害嗰啲亦明白越高調出聲就越大鑊，一陣「激嬲共產黨」搞個正式「人大釋法」就玩完。所以當時只係嘈咗幾日就冇下文，我相信就算在座各位大部份人都唔記得發生咗呢件事。

香港國安法就唔同。港版國安法之辣，在於對付「勾結外國勢力」嘅條文。「勾結外國勢力」嘅各種刑事責任唔單止適用於中國公民，連外國公民都包埋。（順帶一提：黎智英係英國公民） 英國（以至其他國家）人對香港國安法嘅擔憂係正常嘅，因為好多對中國不利但佢哋認為係正常活動嘅行為都被刑事化，佢哋對於北京咁樣「玩串個party」係十分不滿。

但每個國家都有國安法㗎啦（係香港特區比較獨特唔知點解冇咋嘛），指控其他國家立法保護國家安全，講出嚟都俾人笑。如何喺人哋國家搞搞陣而理直氣壯呢？唯有話呢條法律違反人權自由法治 (就算係真，都從來唔係佢哋真心關心嘅嘢)。

佢哋最擔心嘅係，一個英國人喺「中國香港」從事損害中國但有利英國嘅活動，犯咗中國嘅國安法，如果最後英國法官有份判佢罪，咁搞法成何體統？

重點要重覆多次：佢哋最擔心嘅係，一個英國人喺「中國香港」從事損害中國但有利英國嘅活動，犯咗中國嘅國安法，如果最後英國法官有份判佢罪，咁搞法成何體統？

（順帶提多次：黎智英係英國公民）

呢個活生生嘅政治問題，同乜柒人權法治冇咩直接關係。我呢啲唔係咩建制五毛9up，你睇返英國啲法官都唔係個個認同英國外交部嘅取態，例如 Lord Sumption 就似乎曾經講過：

” In reality they are demands that judges should participate in a political boycott designed to put pressure on the Chinese Government to change its position on democracy “ [2]

事實上有個別法官對參與香港司法反感，一早辭咗唔做。我個人相信留到今日嘅，應該都係覺得留喺香港做法官本身冇咩問題。

唔少喺終審法院辦過事嘅人都表明「香港法院唔再獨立」係吹大咗，佢哋甚至似乎接受到2019年11月人大法工委嗰單嘢𠻹 (我個人就麻麻)。不過要調走英國法官總唔可以話係「政治理由」，所以最後唯有講一堆狗屁不通嘅場面說話，明眼人就知佢有苦衷 i.e. 「#你懂的」，唔識嗰啲就以為呢一兩年嚟香港嘅法院真係有咩嘢咁撚大鑊。

你問我嘅話，搵下啲其他「普通法」地區嘅法官加入終審法院都好吖。又唔係英國嘅乜柒特別香。星加坡出名政治審判、刑事誹謗，好啱香港特區政府借鏡借鏡。