耶穌、魔鬼、幻覺

(又係寫啲CLS嘅嘢…)

話說 #耶穌受試探 係新約聖經嘅重頭戲，如果你唔熟書唔記得係咩嚟，容我講兩句重溫下：耶穌領洗之後獨自走咗去沙漠四十幾日，期間受魔鬼誘惑。

耶教向世人講解呢段經文，大概都係話呢個故事講緊耶穌出道之前上主俾佢嘅試練，同埋示範俾世人點樣抵抗魔鬼誘惑。

話說耶穌同佢嘅門徒全撚部都係講parables嘅，新約聖經嘅parables梗係比比皆是。「你哋聽嘅都聽唔曉，睇嘅都睇唔見」（馬太十三）我哋現代資訊發達，有幸可以上網查資料，對經文有更深層次嘅理解。一個故仔唔夠，搵多個對比：佛佗喺菩提樹下得道，都係馬拉松式苦修四十幾日 (亦有說 7日)。結論：一係耶穌抄咗佛佗嘅出道儀式，一係「馬拉松式苦修四十幾日」係修練成聖人嘅必要步驟。

以上嘅嘢其實「係人都知」，只係我驚死大家「聽嘅都聽唔曉」，將段引言寫得長咗少少。

耶穌係咪抄佛佗橋呢？話說佛佗喺菩提樹下都有被魔鬼誘惑嘅傳說，只不過冇咁出名 (好似係，我唔識， Google返嚟架咋)。而耶穌受誘惑就「迷幻」得多，一陣又飛上太空，一陣又飛到聖殿頂，用一個現代啲嘅講法就係有人喺沙漠飢渴交迫仲要冥想搞到思覺失調(psychosis) 睇到幻覺。 Turns out 精神病院嘅 xx% 病人都以為自己係耶穌救世主，但相反真嘅耶穌見到呢啲幻覺，就同魔鬼講 #收皮啦 ，我只係一個卑微嘅人，你呃我唔到嘅。 只有拒絕沉迷幻像，返回現實先至可以做到聖人 。呢個先至係經文背後再背後嘅意義。你諗下耶穌啲徒子徒孫修行嘅時候遇到同一種情況 （中國人叫佢做「走火入魔」），究竟佢哋係會俾人送入精神病院，定係修成正果做濟世安民嘅老師⋯⋯ 呢個時候熟讀經文就真係好重要。

btw, 去到呢個位，應該就冇得話抄啦，暫時Google唔到佛家經文有講同一樣嘢，就算有都係抄得高章。另外一點係，正常嚟講坐喺樹下修行未必咁易思覺失調，起碼唔係講緊喺沙漠缺水缺糧。所以我傾向覺得呢，兩大宗教講兩大聖人呢兩單嘢都應該係真真哋嘅⋯

利申：好明顯我唔係教徒啦。只係我對「做先知」呢樣嘢有少少興趣，得閒會研究下咁。想學做先知就要向啲前輩s偷下師，偷完開心share咁。