偽科幻小說：DNA 創造論

(irrelevant context https://www.youtube.com/watch?v=5Sq89AJI19c&t=70s )

【12000年前… 絕種生物… DNA 重新接種…】

睇完段片，我腦入面忽然諗到一個好癲嘅假想。

話說 12000 年前地球進入新仙女木期，本身處於冰河時期嘅地球氣溫再一度急降，好多生物都絕種。可能個急劇變化係一堆天災導致，以至多種大型動物 (長毛象、劍齒虎etc) 絕種。

如果連長毛象呢啲聽落咁耐寒嘅動物都頂唔住，點解大家會覺得人類真係冇絕種呢？

「喂，當我死㗎？！」

well… 世事無絕對嘅。

首先，呢幾萬年其實有好幾種人類絕咗種。咩 Neanderdal 呀 Denisovan 呀，都係絕咗種嘅人類嚟。佢哋係「現代人類」嘅近親，甚至 Neanderdal 嘅頭腦大過我哋，絕對唔係蠢。如果現代人類冇絕種，大概只係好彩。

問題係，如果你同我仲活生生，我哋嘅祖先點可能絕咗種呢？

呢個問題就同條片有少少關係喇。睇返條片，究竟冰入面啲史前動物係咪絕咗種？ 係。但我哋可唔可以攞佢嘅 DNA 出嚟覆製返啲類似嘅生物出嚟呢？絕咗種嘅生物有冇可能返生？ 理論上係可能嘅。 但 12000 年前有邊個咁得閒？

⋯⋯

大家諗下啲遠古傳說⋯⋯

記唔記得《創世紀》嘅傳說？上帝用「泥土」製造第一個人類。聽講世界各地都有呢個傳說，都唔係淨係耶教咁講。雖然正常理解係古人識得用泥土製陶器製泥偶所以覺得用泥造人都好正常 (之類啦，我又9up)，但如果呢啲「泥土」係掘出嚟絕種人類嘅遺骸呢？

至於係咩「嘢」咁得閒掘返人類基因令我哋種族復活呢？外星人啩。 想像下，地球天災大爆炸，生物死得七七八八，有路過嘅外星生物睇住覺得「咁靚嘅星球，咁多生物，毀滅咗真係好可惜」 然後掘返啲人類同動物 DNA 出嚟，復活返佢哋，喺個「伊甸園」(太空船？ ~_~)養到肥肥白白之後就趕佢返地球繁衍。 (照下鏡，我哋現代人類都係啲咁屎忽痕嘅保育撚嚟)

成件事好 make sense 呀。至於成個推論最唔合常理嘅「外星人」？… 喂啲證據仲唔夠你懷疑主流論述咩？ (另按：寫緊篇文講下呢啲嘢⋯ 不過個坑開得有啲大，未必咁快起到貨。)

至於我有冇咩證據我講嘅嘢係真？梗係冇啦。不過其實好多嘢都冇證據架，就算係傳統科學都係靠9up完再認真驗證。我哋啲想像力越擴闊，就有越多嘢可以去驗證。正所謂「大膽假設，小心求證」就係咁解。 (但歷史好難客觀「驗證」，所以⋯ well 都係等我嗰篇文寫好再講)

話時話，第一次聽人講「 12000 年前」呢個 magic number 我都唔信有咩特別，但留意開就到處都見到，同《涼宮春日》不斷講嘅「三年前」一樣咁恐怖。