人人平等

每個人都有自己特點同長短處，喺某一個特定範疇內肯定係有高低之分。

所以，要理解「人人平等」係咩一回事，就要先明白世界係好大，就算有人喺某一個甚至幾個範疇叻過晒所有人，都唔代表啲咩。相反，有人喺某領域比唔上你，唔代表佢個人本身一無是處，好可能只係你世界唔夠大，未理解到佢其他方面嘅長處咁解。

所以我係堅決唔認同某個領域內嘅「人人平等」。如果有既定嘅前提，啱就係啱，錯就係錯，勁就係勁，廢就係廢。過份自信或謙虛都唔好。但好多人嘅世界觀太細，以為某單項目嘅水平就可以代表一個人嘅全部價值。左嗰種膠就會話咁不如唔好比較，唔好分水平高低，人人平等，所有嘢都係觀點角度；右嗰種膠就會話你某方面好廢，所以你整個人都係垃圾。其實兩邊都係錯到離晒譜嘅。

呢個世界好大，淨係人間世都變化萬千。社會需要各種各樣嘅人，真係冇得話咩類型嘅人重要啲 (話有得比嗰啲係先假設咗某種 XX 主義 (eg. 資本主義) 價值觀 )。咁唯有「和稀泥」假設所有人都平等。如果有「上帝視角」知道世界發生嘅所有事，可能「人人平等」唔成立，但我哋作為凡人，承認自己嘅觀點角度喺大千世界面前微不足道，係一種唔會錯嘅謙遜。