點解 Donald Trump 衰收尾？

點解 Donald Trump 做總統，臨到尾會咁羞家，輸咗唔認數，煽動群眾包圍議會引致暴亂，搞到眾叛親離？ 我認為最大原因，純粹係佢「從政經驗不足」。

美國嘅總統，冇乜邊個係本身冇公職，忽然就選贏做總統。(懶得查晒咁多位，不過起碼近幾十年都應該冇) 通常都係做過議員或州長十年八載，然後先去選總統嘅。呢啲「經驗」，唔單止教識一個人點樣做政客/政棍，更重要係個環境會不斷灌輸啲價值觀，令到呢個人或多或少都抱有政治圈嘅「核心價值」。相反，喺商界出身，有另一套遊戲規則，傾唔掂數攬炒都係常態，最多單deal冇咗，賺少幾個錢，最多都係破產，唔會見血 (通常)。不過將商界邏輯攞去做國家元首，就可能變成輸選舉攬炒國會。

另外，社交圈子都好大影響。如果你喺國會做咗兩任議員，照計做唔出煽動群眾包圍議會向議員施壓叫佢哋違背憲法。你喺國會做過議員，同其他議員有啲交情，總唔會仆街到要脅班老朋友條命去搞場政治show出嚟威威。相反，冇包袱就可以去得好盡，真正嘅 #nostake，冇嘢輸。

以前嘅政客，好難就咁橫空出世，冇做過公職就選贏總統。唔講其他，同傳媒打好關係，已經需要好多年去經營。有政績，啲大報記者評論員先會吹捧你，然後群眾先會認識你，然後你先至會有票。不過原來喺21世紀，一個商人只要夠恆心，花好多錢去選，用社交網絡直接接觸群眾，繞過傳統媒體，一樣有得贏。

我諗現代嘅西方民主係時候諗下，點樣修正制度，減低政客/政棍利用互聯網直接煽動群眾破壞「遊戲規則」嘅風險。呢幾個月，臉書同推特都開始主動做 “fact check” (換一種講法就係政治審查)。究竟 #言論自由 重要啲，定係維持政制穩定重要啲？咩講得咩唔講得，點樣取捨，點樣監管，點樣避免變咗個「真理部」出嚟，或者甚至如果「真理部」無可避免，點樣避免權力落入私人機構？呢啲都係呢幾年佢哋要認真諗嘅問題嚟。

我就唔識答嘞，亦都冇咩興趣研究 (反正香港人都係等候大國s發落架啫)，純粹係預告之後好可能出現嘅花生咁解。可能去到最後，果然都係中國特色社會主義優勝，連西方國家都發現太自由嘅網絡會被別有用心嘅政棍以至外國勢力用嚟煽動民粹，所以必須成立由政府控制嘅網絡監管制度。喺歷史上好多新出現嘅事物一開始都冇監管，到出事嗰陣先開始有專責機構制定規條去管理。可能幾十年後嘅人習慣咗網絡監控，佢哋睇返 2020 年，會覺得呢啲私人企業操控嘅大型社交網絡好似 the Wild West 咁，無法無天。

無論如何，世界返唔到轉頭，究竟新世界係點，拭目以待。

(原文於 2021 年 1 月發佈，略有修輯)