香港嘅政棍咁多年都冇進步過。

十幾年前，民主黨「走入中聯辦」密密斟，俾其他政黨圍攻話出賣民主、出賣香港人；十幾年後，同一班人，叫啲後進放棄從政，唔做政治花瓶。

箇中變化係乜？政改嗰陣，民主黨以自己喺區議會勢力最大，開超區議席肯定有著數，所以肯同中聯辦傾。當其時其他泛民政黨冇咁多區議員，冇著數，自然唔肯制。

今日情勢又唔同嘞。叫人唔好參選嗰啲，大多係晨早上晒岸半退休，本身唔諗住選，最緊要最後幾年保存名節；又或者係因《國安法》坐緊監或逃亡緊，反正冇資格選。自己唔選，冇十萬蚊薪津，梗係唔「跪」啦。#魚蛋論：我冇得選，你哋都唔好諗住選。

至於而家立法會唯一反對派，有咗議席之後，立即擺脫以往「激進」偽裝，乖到不得了。十年前你屌我入中聯辦，十年後我屌返你留喺立法會宣誓效忠。十年之間，身位互換，唔係咩政治上嘅覺悟，純粹係為咗區區十萬粒魚蛋。

香港地紙醉金迷，十萬蚊算得係咩？咁少錢就買起咗一個人嘅人格同政治立場，講出嚟都笑死人。如果中聯辦學肥佬黎咁樣玩黑金政治，喺枱底過幾億維穩費派俾各反對派政黨大佬同埋KOL，唔好話咩政改，就算本土國安條例都晨早通過咗啦。

人類本性自私，十萬蚊對窮撚政棍嚟講，都係可觀數目，所以佢哋睇錢至上本身都冇乜嘢。最搞笑其實係啲支持者。鄭議員真係講得好啱：#選民真係白痴。投票俾政棍都算，政棍借個議席自肥都算，啲支持最屈機嘅係，政棍講乜都仲要撐到底。入中聯辦傾計又撐，真心擁護基本法又撐，走佬又撐，到而家冇得選搞魚蛋論又撐。

「跪定唔跪」本身係當事人睇自己有冇機會攞十萬蚊薪津，同啲村民一啲關係都冇。不過又真係有人好關心呢啲嘢，搞到好似自己有份收份糧咁。話呢啲人「白痴」其實可能已經係抬舉。

就算喺 2020 年之前，反對派從來都只係政治花瓶。喺功能組別公司票傾斜之下，反對派從來都冇機會取得過半議席。有機會嗰陣，自然有人會改變遊戲規則。我諗，稍為有少少智商嘅人，都唔會係呢一兩年先至知。

所以啲政黨呢廿年嚟究竟係做緊乜呢？做政治花瓶呃飯食咋嘛。點估到選民真係咁白痴以為真係有得 #抗爭。更神奇嘅係，啲花瓶俾人吹捧幾下就以為自己真係有本事抗爭，嚟真嗰陣，齊齊入冊。

邊有咁多宏偉理念吖大家。只不過係你呃我，我呃你。

咁多年嚟，我淨係識得一個政棍講明參選嘅目的就係入去咬糧同埋搶光環，養肥自己再講。他朝今日，君體相同，起碼佢老老實實，冇當選民係白痴。香港啲政棍s幾時先至真正 #覺醒，肯同人講真話？

「議席係一場政治資源爭奪戰 … 要推動咁宏大嘅政治主張，糧草一定要先行。」