見人寫余英時訃文，我又寫下嘢

三小時前放工返屋企上網，見到有人悼念 #余英時 。當時，我淨係知佢係名博客 #王偉雄 教授嘅偶象，除此以外對佢嘅生平一無所知。

不過 21 世紀唔使下下請教 #老師s，有 Google 就可知天下事。查咗一輪之後，越嚟越明白點解佢咁出名，同埋點解王教授咁鍾意提起余老⋯⋯

余老做過三間長春藤學校嘅教授喎！威唔威先！淨係撻朵都嚇死人啦！

我就好似stalker咁不斷摷余英時嘅背景資料：中文維基百科點寫佢呀，英文維基百科點寫佢呀，得獎嗰陣啲人點樣吹捧佢呀，以至今日啲訃文點講佢呀，我腦海浮現一個我最尊敬嘅人⋯ 云根老師。真係幾似架！

可惜根老師冇哈佛大學教席，不過佢哋 #博古通今 、#我即華夏 嘅傳統中華功夫就肯定係同出一轍。根老師鍾意道家佛家，余老似乎就係儒家fans嚟。

不過咁就慘嘞。

儒家講究嘅係仁義禮智信、長幼有序、君君臣臣；不過若果你喺美國頂尖大學讀書，啱啱喺嬉皮士最盛行嘅年代考到個 PhD 返嚟，唔通真係周圍教人要 #尊師重道，唔好搞咁多 #個人主義 嘅嘢咩。咁會揸兜架。

話說，做學者點樣避免揸兜，係孔夫子用咗一世嘅辛酸換返嚟嘅學問，儒家門生冇可能唔識：孔老夫子嘅年代，天下大亂將至，佢周遊列國，希望求得一官半職，做一番大事。但係佢淨係識得背書講周公禮法，唔識得迎合老細需要，最後無功而回。不過，失敗乃成功之母，佢啲學生就進步得多喇。太史公曰：「七十子之徒散游諸侯，大者為師傅卿相，小者友教士大夫。」點解嘅？

因為經過幾代傳承，佢哋開始識睇君主眉頭眼額。去到孟子年代，佢同國君嘅互動已經有啲唔同，有講有笑，識得𠱁老細：齊王，我睇你連隻牛牛都唔忍心殺，肯定係仁君嚟啦！行王道，你得嘅！

去到戰國末期，啲「儒家」策士玩「國君面試」嘅遊戲已經出神入化。為咗做官「仁」、「禮」都抛棄晒，個個走去鑽研「法治」呢個新科技。所以荀子作為儒家門人，教出嚟嘅學生可以做秦始皇政府嘅高官，你喺李斯身上，梗係完全聞唔到半分孔夫子嘅氣息。

今日聯合國百幾二百個國家，形勢比春秋時代更複雜。儒家傳人離開中國呢個(上古嘅)禮儀之邦，去到荒蠻之地軍事霸權美國，唔通真係拎本《論語》出嚟叫人 #守孝三年 咩。當年孔夫子帶住班學生食閉門羹有幾柒，大家都耳熟能詳。所以，去到美國，孔子門生梗係話夫子都支持 #民主，#民主大法好，共產黨仆街陷家鏟，咁先有長春藤教授做架嘛！

可能有人問：乜鳩噏冇後果架咩？梗係冇啦！孔子孟子兩千幾年前就死咗，儒家傳統喺 #五四運動 俾人砸爛晒。作為二戰後唯一強國嘅頂尖大學學術權威，你話其實 Johnny Kung 教人吸毒玩女人都可能有人信呀，始終美國啲 #理論核彈 係堅料嚟，日本仔唔信邪嘅後果，當年大家歷歷在目。

所以點解余老當年可以隨便抽幾句《漢書》嘅內容翻譯成英文就攞到個 PhD ，仲有幾間大學請佢做教授呢？ #你懂的 。推你上神台做權威，就係想你實牙實齒咁講：「在坐各位都係臘鴨，你以為孔夫子思想係封建？哎呀，誤會真大！其實佢先至係民主鬥士呀！你哋冇哈佛教席就乖乖聽書啦！」

至於儒家思想係咪同民主有衝突？講真，呢啲嘢，「漢學家」識條鐵咩。你話：中華民國就係例子。喂大佬，人哋台灣政治體制撚係「儒家」咩？國民黨班撚頭日日屌鳩蔡英文，儒家係咁玩架咩？蔡英文有冇作晒狀咁拜天祭地？冇吖嘛。科學精神，唔做神棍，有違儒家宗旨。你以為用漢字就係儒家？你以為儒家淨係中國先可以有？

正如我早前所講，日本就係儒家，英國就係儒家 (起碼世界先進國家嚟講最似儒家就係佢哋)：國君講禮儀排場，權力由上天所賜，至高無上，唔屌得，大家一層層階級，冇得越級挑戰，社會先至穩定。至於佢哋搞民主制嘅成敗得失，就唔係一個美籍中國人有資格說三道四喇。