英國法官退定唔退？辭得到先好退！

唔覺意留意到英國企圖叫法官退出終審法院嘅花生。

新聞報道唔多，英媒主要係 The Times 報道，但本人啱啱俾人罰咗五千蚊好撚窮冇錢俾 subscription 睇全文，所以主要都係睇港媒轉述 （中咗伏唔好怪我)。

Any肥，搞笑位係英國外交部同最高法院現任首席法官Lord Reed似乎想叫啲法官撤退，但個別法官卻姿姿整整諸多藉口。Lord Sumption 仲寫咗篇文，話國安法同新政制唔影響法治，話你英國人咁多年都冇俾香港民主，從來都無礙香港法治嘅發展，法官唔應該搞咁多政治嘢，但而家集體退出係政治杯葛。另外據報 Lord Neuberger 同 Lord Walker 都接受咗延長任期嘅安排，可能都係低調咁表態叫政府唔好阻我搵食。

究竟唔「民主」嘅國家有冇「法治」呢，我已經多次講過我嘅睇法，有人同意有人唔同意，大概都係實然性同應然性嘅差異 （即係打唔打飛機嘅分歧），呢個唔係重點。

重點係食花生吖嘛！喺政治上，英國近年其實係越嚟越民主、自由化，但英國自古以來傳統政法制度係君主立憲、士族議政、三權合一，而法官喺三權之中係比較泥古同保守嘅，佢哋當中有人唔賣你班自由派嘅賬一啲都唔奇。睇住英國嗰班友仔咁款就都幾搞笑，如果啲退休法官賴死唔走，英國政府有冇法子呢？我真係唔知。而家英國政府未做好統戰工作就諗住出手，中國一條毛都未傷到，自己就已經柒像敗露。有人高調表咗態賴死唔走，唔通真係告佢 high treason 咩。老老實實，如果真係想搵藉口唔做，直接表明自己唔願意宣誓效忠中共控制下嘅「中華人民共和國香港特別行政區」，好過攞「法治」嚟過橋。起碼我係咁認為。 不過咁樣雖然係講真心話，但又會冇咗 #道德高地，哈哈哈。

(原文於 2021 年 3 月發佈，略有修輯)