美國親身示範象牙塔嘅威力

香港人成日話社會學、政治學、文史哲等人文科目冇用，而家美國就為大家送上一個大大嘅反例。

香港由於長期被殖民，象牙塔淨係識得拾人牙慧，人云亦云，將外國嘅製成品照抄就當係做咗嘢。但事實上，象牙塔真正嘅作用，係製造神話、傳播意識形態。每個國家嘅象牙塔工作者都會參考自己嘅歷史、文化，配合政治需要，製造出一套符合自己國家民族利益嘅價值觀，並且利用自身學術權威，為呢啲價值觀賦予正當性。

而美國嘅阿富汗戰爭，就係「意識形態」搞出嚟嘅問題。

一個 911 恐襲，迫使美軍攻打同佔領阿富汗呢個落後國家。作為「文明世界」嘅霸主，佢哋總唔能夠學啲野蠻人為報仇屠城然後拍屁股走人。喺「美國價值」驅使下，佢哋自設道德責任，自信有能力將轄下地區變成一個符合西方民主價值嘅國家。

呢個「美國價值」嘅神話，據報二十年積落嚟，盛惠 $2 trillion，每日平均使幾億美金 。

美國係民主國家，理論上起碼有一半人係「願意」科水嘅，唔算係冤枉錢。不過事後發現原來咁貴，仲要最後得個吉，正常人都會覺得被騙啦。呢啲「美國價值」實踐起嚟原來咁大鑊，專門研究並提倡呢嚿垃圾嗰啲哈佛耶魯 tenure 晒嘅神學教授，唔知有冇打算負返少少歷史責任呢？

對於我哋香港人嚟講，呢個反面教材其實好令人「鼓舞」。意識形態可以「浪費」到幾萬億美金，當然有創造同等價值嘅潛質。「文史哲」呢類人文科目，如果我哋以正確態度去研究，肯定對香港有所增益。但一定要明白嘅係，外地輸入嘅價值觀會「水土不服」，通常都唔啱使。抛棄一切對強國霸主嘅無謂幻想，從根本開始摸索適合我哋嘅道路，相信係漫長同吃力不討好嘅。但係，如果唔做嘅話，我哋無以前進。

所以，睇得明嘅，共勉。