究竟邊個發現美洲大陸？

《Nature》早前刊登咗一篇題為《Face masks: what the data say》[1]嘅報道，總結返關於戴口罩有冇用嘅科學證據。

我一路睇一路笑，雖然內容都係認真講學術論文，唔係搞笑嘅。

咁點解我會笑？

// At the beginning of the pandemic, medical experts lacked good evidence on how SARS-CoV-2 spreads, and they didn’t know enough to make strong public-health recommendations about masks. //

所以就要講下，究竟邊個發明美洲新大陸嘅問題。教科書當然話係哥倫布發現新大陸，但係美洲原住民係咩嚟？甚至有人指出，維京人一早發現咗北美洲嘅大陸，不過搞唔成殖民地而已。

歐美學術期刊所謂嘅「冇足夠證據」只不過係「我哋明明唔識又唔肯信人」嘅修辭嚟。叫得SARS-CoV-2，明知同舊沙士係同類病毒，都唔向亞洲國家取下經？當年沙士係點打嘅？就算冇「足夠科學證據」兩隻沙士嘅特性相似，用返少少「常識」都知道戴咗總好過冇戴。

當然呢啲「常識」未必經得起科學驗證，但做公共政策唔係玩科研，決策者冇得等證據充足先做決定。到今時今日，有冇任何「戴咗口罩仲差過冇戴」嘅科學證據？

冇吖嘛。

《Nature》篇文就話 // didn’t know enough to make strong public-health recommendations about masks // ⋯ 不過事實係點呢？班「專家」因為驚人搶晒啲口罩，搞到醫護人員冇得用（所以佢哋明明就好清楚口罩可以防止傳染病），所以喺媒體上不斷叫(ie “recommend”)人唔使戴罩。They didn’t know enough, but made the wrong recommendations anyway. 科學萬歲，知識就是力量，哈哈。

去到最後，班歐美科學家搞一大輪，「證明」戴口罩真係有用，佢哋就會話「某某博士發現戴口罩有用」或「2020年科學家證明戴口罩有用」，所以科學萬歲，大家都要相信科學(家)呀！

至於亞洲國家一見到武漢封城就即刻進入「沙士mode」人人戴罩停課停學，呢啲大概係東方蠻夷用「唔科學」嘅方法咁啱撞中啫。例如台灣一直保持零感染，當然唔使重視佢哋嘅經驗。就正如對歐美主流嚟講，美洲原住民一啲都唔重要，甚至嗰啲由原住民開發、後來有助推動人類明文發展嘅各種農作物 — — 薯仔、辣椒、粟米，都係由歐洲人去到美洲「發現」嘅。

聽講哥倫布一開始西航計劃係因為計錯地球周長，以為西航好快到達亞洲。歷史上有好多誤打誤撞發大達嘅例子，不過如果以文明同知識自傲嘅「科學界」都仲打算無視科學家喺Covid 犯下多重錯誤，仲打算spin成知識好偉大科學家搵到好多新證據大家一齊長知識，佢哋不如老老實實話自己係新一代教廷，不要問只要信好過喇。

[1] https://www.nature.com/articles/d41586-020-02801-8