科學同迷信

現代科學遇到樽頸，係時候重新審視傳統智慧。唔係話要「反科學」到提倡地平說咁極端，而係西方科學近幾個世紀急速發展嘅同時，為咗思維嘅創新，唾棄咗好多傳統流傳落嚟嘅智慧，話嗰啲係「迷信」、「神話」，甚至係最 tautological 嘅「唔科學」。

例如，上古傳說好多神仙、魔法，究竟係咪全部幻想出嚟架呢？ 我哋知道，如果史前人類喺今日嘅大城市兜一轉，佢會以為我哋係神仙，識魔法。究竟啲上古傳說有幾多係古人接觸到先進文明嘅真實紀錄嚟呢？ 現代人假設人類係地球唯一文明生物，又假設人類技術係由猿人慢慢進步到今日，從來都冇考慮過如果幾千年前地球已經有先進科技會點樣。先進嘅科技過咗幾千年，未必會留低好明顯嘅痕跡，就算21世紀人類文明盛極一時，過多幾千年都可能只係留低一堆垃圾膠袋為證。何況一切都係相對而言，例如西班牙人首次到達南美，都一度被誤以為係神氏。

有時呢啲「洗腦」根深蒂固，就算我明知有問題都好難擺脫。有好多科學結論，你冇可能重複實驗，都係唯有相信，或者人云亦云。有啲嘢假得太離譜，例如「食物金字塔」，有生之年有可能會見到佢被推翻；但有啲無從考證嘅，例如宇宙起源，就只能夠依靠觀星祭司(通稱天文學家)同你講解佢哋自己深信不疑嘅上古神話傳說(Big Bang Theory)。你問我係咪有更高明嘅見解，我就梗係冇。真正嘅無神論唯物論乜乜柒柒，係唔需要問宇宙起源嘅，幾億年前推演出嚟理論上曾經發生過嘅嘢係資產階級喺科學時代代替占星術嘅茶餘飯後話題，同人民日日面對嘅階級鬥爭似乎毫無關係。

至於嗰啲高深莫測但又存在於日常嘅各種實用科學理論，一般人識得唔多，識咗都未必見得有用。爐火燒得熱隻鐵鑊可能同量子力學原理有關，但飲食點樣先叫健康到而家喺「科學」層面都冇咩概括定論，反而世界各民族嘅飲食傳統，喺物競天擇之下，反映出好多現代科學捕捉唔到嘅智慧。

Reductionism 去到今時今日大概已經係一種信仰，CERN 就係負責建造呢個信仰嘅神殿。由牛頓去到愛恩斯坦之間嘅科學革命係實踐呢個信仰到極致嘅充實成果，但世界嘅複雜現像唔可以純粹用相對簡單嘅方程式去表達，亦都唔易抽絲剝繭去搵到一個實在嘅因由。學術界某啲範疇流行玩 p-values 造紙，就係 reductionism 到盡頭嘅徵兆。玩 p-values 出事，某程度上同古代人犯嘅錯一撚模一樣，都係誤將偶然當係必然，然後教其他人去深信不疑。當然，做唔到立竿見影，都唯有喺偶然中尋找同驗證道理。上古流傳嘅迷信同傳說，同今日啲所謂 95% statistically significance 其實未必有本質上嘅差異。

喺資訊時代，我哋有冇本事發明比古人更加先進嘅系統去處理呢一堆似是非是嘅概率關系呢？我覺得呢樣嘢先至係日後人類文明能否更上一層樓嘅關鍵。