無條件

自從得知《無條件》歌詞係為誰而寫之後，細嚼之下，慢慢感受到另一種味道。本來作為聽眾只感受到填詞者嘅浪漫真情，而家卻開始體會到淡淡嘅苦澀。

歌詞一開始，情人已經「不說話」、「期盼有落差」，可見兩人關係已經出現裂痕。「不可改變的改變」、「不要發現的發現」大概係情人對作詞者嘅指控，詞中話係「放大了缺點」。對於呢啲指控，作者無能為力，只好搬出偉大無條件嘅愛，希望感動對方。

聽眾固然動容，但情人收唔收貨呢？對於「很多未達完美事情」，作者都「只懂得努力每天」。想像下，其實同「落力為你好，得不到分數」冇分別，都幾淒涼。情侶之間若果眼中只有對方缺點，一方為「改善」呢啲「缺點」而「努力」，咁呢段關係已經危在旦夕。

作詞者嘅真心同苦心感動千千萬萬聽眾，但始終感情係兩個人嘅事，一人獨力支撐，最後結局原來真係唔難想像。