曹操先至係赤壁之戰嘅最大贏家

赤壁之戰好可能係中國史上最出名嘅一場戰役。

呢個小學生都耳熟能詳嘅故事，原來幾十歲人重新再睇次都會有新體會。

《演義》嘅講法係諸葛亮向劉備提出同孫權聯合抗曹，交戰時化身為巫師借東風火攻取勝。正史主要將戰績歸功於孫權周瑜魯肅，吳勢力對形勢嘅分析、交戰時出嘅力，都係貢獻最多，劉備甚至可能只係負責抽水。

今次再睇赤壁之戰，卻感覺到由頭到尾都係曹操操局，以大搏大。如果佢打贏江南，基本上可以做皇帝，所以某程度上佢可能係心急咗，但佢打東吳唔止係為咗「贏」咁簡單。當其時形勢，未必到佢話唔打。曹操攻吳之前，啱啱劉表死咗，劉琮率荊州眾投降。雖然係咁，但江南兵士未必真心服從，呢個係曹操收咗荊州之後最急切處理嘅問題。

荊州之所以投降，係因為震懾於曹軍淫威之下。但好明顯江南人同北人有好大文化衝突，唔係話曹操搵個將領守荊州就OK。嗰幾萬名啱啱投降嘅荊州軍隊，喺曹操北返之後，會唔會受劉備唆擺造反，仍然係未知之數 (其實我估機會好很高)。話晒劉表仲有個仔未投降，而已經變成咗地膽嘅劉備仲喺江南等待機會，曹操係冇可能唔打返幾場仗就收隊嘅。始終荊州對曹操嚟講係 free lunch，反而劉備喺荊州經營多年，差少少就喺劉表手上呃咗返嚟，曹操最怕嘅敵人差少少就多咗一個大州嘅軍隊同資源。

喺曹操角度，勸降劉備係冇可能嘅事，強攻其他未投降嘅荊州城池（或流亡軍隊）又會有好大阻力（啱啱投降就要荊州人打自己人？肯定反抗）。但呢啲「走咗就唔聽話」嘅兵將又唔可以罷低唔理，最好就係搵個藉口消滅咗佢哋啦，係咪？

所以曹操就順手去東吳嗰度敲門嘞。曹操整個盤算就係：

1. 如果孫權投降，咁就基本上統一天下，正！
2. 如果孫權反抗，就用荊州勢力打死孫權！
3. 就算打唔死孫權，都可以迫荊州多餘唔聽話嘅士兵去送死！

Win-win-win situation 呀，其實曹操冇得輸。相反，如果唔打呢場仗嘅話，曹軍一返北方，劉備就好可能用佢啲「仁義道德」勸降幾個荊州城池坐正做荊州牧。與其俾強敵劉備賺咗荊州，不如攞去同孫權「攬炒」！呢個先至係赤壁之戰嘅真相。

咁孫權都唔係傻嘅，佢都睇得出曹操嗰「幾十萬大軍」水份甚多，冇咩戰鬥力。你曹操叫荊州軍嚟送死，唔通我孫權就會投降咩？打咪打囉！

赤壁水戰之後，曹操退卻，孫權軍梗係乘勝追擊。但值得留意嘅係，曹操雖然走得狼狽，但周瑜強攻曹軍受流矢所傷，曹仁守咗江陵差唔多一年先被迫撤退，唔係「兵敗如山倒」嘅模樣。證明曹操喺北方仍保持基本嘅防守實力，赤壁死傷嘅好可能真係只得嗰班「走咗就唔聽話」嘅荊州兵將。

我斷估曹操唔會傻到「明知輸都打」，但呢場赤壁好可能係曹操明知勝算唔太高都照打嘅戰役嚟，所以「輸」咗好正常。歷史上北方軍隊攻南方可以借鑑嘅事例唔多，我哋睇後來嘅淝水之戰等戰役先知道，就算北方軍隊幾強，長江天險都唔易克服。另外，要荊州軍士去「送死」其實唔太易，曹操趁住個個都以為佢好勁嘅時候，用「攻克東吳嘅戰功」去誘惑荊州投降派為曹操賣命，總好過要慢慢諗點樣用行政手段壓抑荊州反曹勢力。最後曹操雖然發生咗 worst case scenario，但起碼劉備獨佔唔到荊州，仲同孫權鬧翻，荊州人亦都死傷無數，反而曹操原本北方實力冇咩受影響，只係南侵嘅計劃受阻。

喺一個曹操冇攻吳嘅平行時空，曹操返北方之後，劉備聯絡荊州舊相識 coup de tat，接收完好無缺嘅荊州軍隊。嗰陣曹操再南下打仗嘅話，孫劉聯軍嘅實力就唔淨係將曹操打走，而係有可能直接消滅埋曹操，兩者問鼎天下架喇。所以無論曹操覺得勝算有幾大，佢都係要打。贏咗做皇帝，輸咗都可以攬炒江南，正所謂「冇成本又可以玩嘢，點解唔做？」

赤壁之戰，曹操就算輸咗都贏。黑暗兵法嘅嘢，真係要咁上下年紀先至明。

(原文於 2021 年 3 月發佈，略有修輯)