普通人嘅神力

「我(不為人知)嘅選擇會唔會影響其他人呢？」

呢個係一個好無聊，但我又成日都忍唔住去諗嘅問題。

正常嘅睇法係：梗係唔會啦！你唔話俾人聽你做咗啲乜，點可能影響其他人呀！

照計正常係咁。如果人真係有「獨立自由意志」嘅話。

不過人嘅意志，事實上一啲都唔獨立。

如果你係相對「正常」嘅人，你選擇做嘅嘢，好多其他人都會做；你選唔做嘅嘢，亦都相對少人會做。所以，最起碼，你嘅選擇同其他人係有好大機會有強烈嘅 correlation。就算你唔話俾人知你做咗啲乜，最後都會同好多人一齊做。

呢個結論其實好「無聊」，係人都知。

個問題其實係 interpretation。

例如話，某人眾籌醫病。我其實係想幫佢，不過又心諗：「我最多都捐到十蚊，多我一個唔多，少我一個唔少，算啦咪煩。」我呢個諗法，如果所有其他人都一樣咁諗，咁個眾籌就會失敗。

但以上嘅心路歷程，如果我唔話俾人知，會唔會「傳染」呢？

現代科學話：唔會呀，點會唧？我哋冇證據人類識得心靈感應。

但事實上就係，如果你真係咁諗，而你又係一個好普通嘅正常人，咁結果好可能係大部份人都會同你一樣咁諗。

個客觀事實係，你嘅諗法其實唔會「傳染」，不過由於你諗嘅嘢係受各種環境因素影響，其他人喺同樣環境下，都好大機會得出同樣結論。

但「客觀事實」係廢嘅，世界上最重要嗰種叫「#主觀事實」。

因為，你做最後決定之前，其實係唔知道自己即將會做咩決定。重複：** 你做最後決定之前，係唔知道自己即將會做咩決定。**

即係話，喺主觀角度，假設「你嘅決定係同其他人嘅決定 highly correlated」係既定事實，你即將做嘅決定，主觀上有機會影響呢個世界有幾多人作出同樣決定。

呢個「現像」(?)真係好有趣。姑且命名為「普通人嘅神力」。

主觀同客觀現像如何 reconcile 呢？ 我諗真係要搞清楚「我」同「自由意志」係咩嚟。

人類以為自己有「自由意志」，事實上都真係有「自由意志」。不過兩者其實係唔同嘅概念。人類自以為嘅「自由意志」，係講緊「我」作為獨立於其他人嘅個體嘅意願。而人真實擁有嘅「自由意志」入面嘅「自我」，係從環境中注入咗好多好多嘢，甚至可以話「我」嘅內容全部都係由環境所構成。社會上每一個人嘅「自我」，係一個集體嘅一部份，所以係共通嘅。每一個「自我」都有共通嘅「因」，所以結果都會共通。

所以，你作出一個決定嘅時候，客觀嚟講其實係一個「發現共通因果」嘅過程。不過喺主觀角度，你「願意」發現一個乜嘢嘅世界，好可能世界本身就係咁嘅模樣。

所以如果你係普通人，你就有「改變」世界嘅力量。

至於睇得明呢篇文嘅人，應該冇呢個本事啦。哈哈。