政治犯係邊個整出嚟？

製造政治犯，要有兩個先決條件：

剝奪人民自由或生命去維持政治現況嘅政權
願意付出自由或生命去爭取政治理想嘅人

呢兩者會互相指罵，但好搞笑地，其實佢哋都係相信同一樣嘢：政治比一切都重要，為咗達到政治目的，自由甚至生命都可以捨棄。唯一分別係，政權有權，所以犧牲嘅係政治對手嘅自由同生命；政治犯冇權，所以唯有犧牲自己。

喺我眼中，個人嘅犧牲係高尚嘅，因為犧牲就係以自己嘅付出去賦予意義俾某樣嘢。我一定唔會話某人嘅犧牲係on9*，因為咁講就係否定咗佢所付出嘅代價嘅價值，而眾生係平等嘅。但同時我會認為，「政治比一切都更重要，為咗政治，友情、親情、甚至性命都可以犧牲」呢種教條係萬惡嘅根源。呢類思維，唔單止孕育咗為理想不惜一切嘅偉人，亦都造就咗壓迫佢哋嘅政權。泥古啲就叫「聖人不死，大盜不止」，通俗啲就叫「一個願打，一個願挨」，再粗俗啲就係「你唔食煙我咪唔搭你膊頭囉，你唔搭我膊頭我咪唔食囉」。苦難造就咗佢哋嘅高義，但同時高義亦係佢哋苦難嘅根源。

咁點算呢？

耶教話**，耶穌為救贖人類死於十字架。但為世人犧牲自己係人子嘅責任，普通信徒只需做好自己就夠，唔使亦冇資格用自己嘅血去洗除人類嘅罪孽。同樣地，「政治聖人」亦都唔係普羅大眾可以做嘅工作。某啲政客叫社會上每個人都「關心政治」，學梁振英同志所講：推人去死，不安好心。

— — -

*: 但「人」就會係on9嘅。

**: 利申冇信任何宗教