孟晚舟唔使再慢慢周

得罪主權國周身蟻，無論邊個國家都係咁話。小國發窮惡直接搶，例如白俄羅斯喺領土上空「劫機」；未完成發展嘅大國，有時會喺鄰國「偷渡」犯人返國；但真正嘅世界強國，手段就真係與眾不同。大國講文明、法治架嘛，點會咁失禮呢？作個罪名叫盟友做白手套幫佢「引渡」啲欽犯，寫封信就得，啲 dirty work 唔使自己做。

美國以司法制度企圖「綁架」外國人都唔係新鮮事。比較廣為人知嘅係 Wikileaks 嘅 Julian Assange，澳洲人，佢喺英國俾人控告，一開始係話佢喺瑞典性侵要引渡，匿咗喺厄瓜多爾大使館，變相自我軟禁七年。去到 2019 年，厄瓜多爾大使館放倫敦警察入去拉人，然後美國終於出手話要引渡佢去美國受審。過咗咁多年，大家都唔記得 Wikileaks 係咩嚟，不過美國人冇忘記邊個爆料令佢哋 lose face。總統換咗三任，不過美國人個個都咁愛國，「國恥」係唔會隨著年月而忘記嘅。

另一位冇咁出名，又係同美國冇直接關係嘅「受害者」，係一位自稱 Kim Dotcom 嘅德國人。佢 ~2003 年喺香港 (係呀香港！) 開咗間科網公司，叫做「MegaUpload」，相信有返咁上下網齡嘅朋友都有啲印像。佢 2010 年投資移民去咗紐西蘭。2012 年，美國政府話佢侵犯版權，要紐西蘭政府越洋過海引渡佢去美國受審。而家 2021 年佢喺邊？據報仲喺紐西蘭，仲搞緊引渡。法治吖嘛，慢慢打官司，慢慢上訴。

呢啲就係真正嘅「慢慢周」。

孟晚舟反而好彩。美國換咗個總統，唔再計較華為 5G，又有大國撐腰，出盡傾國之力幫你講數。「只係」俾人軟禁咗兩三年，唔使好似上述人士俾人「慢慢周」，可謂不幸之中嘅大幸。

---

上面案例，令我最「不安」嘅係 Kim Dotcom 嗰單。Kim Dotcom 創立 MegaUpload 幾年之後，有間 startup 叫 DropBox，基本上提供同一樣嘅服務，不過就冇咁多人擺老翻上去share。DropBox 係美國公司，背後有 Y-Combinator 呢啲 VC 投資，自然唔會踩到美國政商界嘅「紅線」。不過，一個居港德國人點解要理會美國荷里活片賺唔賺到錢呢？Well，我都唔知，只知道現實就係地球好危險，火星都就嚟唔安全。想當年香港特區政府都要幫美國佬舐鞋底，特登捉人 BitTorrent 放片。某程度上，甚至陳乃明*都係美國無邊無際司法管轄範圍嘅「受害者」之一。

十幾廿年後，香港公務員全部真心誠意擁護《基本法》，效忠中華人民共和國香港特別行政區，應該唔會再有呢支歌仔唱。所以話呢，沈旭暉冇講錯，識國際關係真係好重要。唔好以為自己喺 A 國家，就唔使理 B 國家嘅政治。就算你唔係佢國國民，又未去過佢國家，佢都一樣可以越洋過海將你「緝拿歸案」。而呢啲國家之間嘅關係，邊個同邊個 friend，一定要搞清楚，否則一個唔覺意，你一係俾人綁架，一係就下半世打官司渡過。