係時候認真做個中國人

從一個功利嘅角度去睇，要認做中國人，呢個係最好嘅時代。香港人最可憐嘅係，以為自己好識諗，計算完一大輪最後搵自己笨。香港人所知嗰套「西方」政治論述，喺佢嘅原產地已經好「過時」。喺美國講呢啲已經係保守主義嚟，越洋過海包裝成進步思想，其實係幾搞笑。你以為馬列毛鄧冇讀過呢啲嘢咩？佢哋肯定仲熟書過你同我。

中國近代五四運動所謂破舊立新，之後動蕩咗幾十年，無非都係俾西方政治意識形態忽悠，一時民主一時軍國一時共產一時民粹，試完一大輪之後終於發現似乎有效嘅「中國特色社會主義制度」，喺我呢啲外行人眼中，幾乎係返返孔孟申韓嘅套路。面對住一班剛剛頓悟「見山還是山」嘅黨員，你攞返啲呃過孫大炮嘅論述嚟同佢哋理論，真係會俾人暗中恥笑架。

寫歷史嘅人大多都係關心政治同政制，最多做埋業餘軍事評論員，所以好多時國家興衰會夾硬拉埋政治制度嚟講。誠然政治制度同國家興亡好大關係，但係咪國家強大就代表嗰個國家嘅政治制度好啲呢？好多時，其實國家實力由經濟主導，經濟又係由民間嘅工藝、技術主導，而呢啲嘢大多出於歷史嘅偶然，政治制度無論點玩都鞭長莫及。

中國成為美國競爭對手，唔代表西方民主制度唔好，只係代表原來中國嗰套都可以一戰。至今「德先生」雖然銀行存款單薄，但係未破產。不過嗰啲早幾年係咁話咩「『權威主義』冇可能成功，共產黨十年內倒台」，攞晒全副身家買「民主必勝」嘅投機份子，卻就嚟輸到底褲都冇得淨。之前啲人吹得越大，而家啲人就越對西方傳統價值觀冇信心。「乜你唔係話共產黨倒台架咩？點解而家中國兇返美國轉頭架？」

早幾年揭過下本叫《The Dictator’s Learning Curve》嘅書，講世界上各「獨裁」政權點樣用各種方法假民主假自由𠱁人唔群起抗爭。我估正常解讀係：西方爭取民主自由嘅人要警惕，「敵人」已經進化咗冇咁易自爆。但我睇完嘅感想係，𠱁得掂人民就已經達到「治國」目的啦，你理撚得佢係所謂「獨裁」定係民主唧？大家都係呃人、黑金政治、打壓政敵不擇手段，你唔係想講有選票就高尚啲呀？

宗教之爭如果係教義上嘅分歧，或者仲有意義。但若果教義接近咗仍然被當作仇敵，咁只代表教義只係幌子，實際上係其他因素作祟。某程度上呢啲係西方殖民主義殘留嘅餘韻，唔肯承認啲「獨裁」政權開始開明化，就抹黑(抹衰?)佢哋「本質上就唔文明，必須被西方文明解救」嘅 XX至上主義。

有時都唔想睇得到咁多嘢，始終一直都話做港豬最好，唔撚識政治最開心。(你睇啲YC唔撚識政治日日鳩噏幾開心？係呀佢哋先至係真正嘅港豬。) 講真喺個人層面嚟睇，人類真係幾醜惡，明明大家夠食夠住可以 eat shit sleep，都會俾人煽動要打世界大戰死幾百萬人先開心。

正所謂「人在江湖身不由已」，心底最明白發生咩事嘅政客，卻要為咗唔想得失選民 (或冇票嘅on9支持者)，唯有明知攬炒都要同對方攬炒。我哋大家都係世界大局中嘅一粒小鏍絲，每人都為推動呢個機器出咗一分力，同時身陷呢個機器裡面「身不由己」。但就算幾咁「身不由己」，我哋成世人不斷喺機器入面轉動，就係我哋意義嘅全部。

「天行健，君子以自强不息 。」 好似係

(原文於 2021 年 3 月發佈，略有修輯)