點解19才子咁19？

呢個問題困繞咗我好幾年，而家寫返個總結作為 closure —

發現去英國讀書嗰啲人，有唔少返返香港都會成身19氣息。例如「19才子」陶傑，有名你叫。近年佢嘅忘年好友 Joseph Lam 先生，更加係呢類人物嘅表表者。 當然，講起 19 點少得關老師 (佢晉身老師職階之前外號「19星」)。

我個結論係：文化差異造成水土不服。英國係一個好重階級觀念嘅地方，啲人又 Sir 又 Lord 咁，出身矜貴，所以部份中上流階級為免俾人高高在上嘅感覺，鍾意得閒玩下膠，同賤民一齊講下笑輕鬆下。

某啲去英國讀書取經嘅人士，正經嘢就學唔識，淨係學咗點玩膠。上等人玩膠就係親民，不過下等人玩膠，簡單嚟講就只係柒。返到香港嘅 19 人士，唔望下自己個名後面冇咩 OBE JP MH 呢啲字母，自己錢又唔多，份工作又唔多 respectable，又走去學埋啲大教授大勳章玩 self-deprecation，最後搞到不倫不類，東施效顰。

可能如果佢哋留喺英國多幾年，撞下板，真係會醒都唔奇。始終做得over咗，總會有人俾你知嘅(前提係你要有正常智商)。不過啲19人士學到半桶水就返咗香港，見香港人唔收貨，佢哋就以為香港人未教化唔識「欣賞」self-deprecation，反而變本加厲，越玩越膠，希望「移風易俗」等更加多香港人學識「欣賞玩膠」嘅品味。

佢哋唔明白嘅係，香港人點會唔識「欣賞」吖，始終俾英國人統治咗咁多年，係有啲文化殘渣嘅。例如肥彭玩膠，大家就覺得佢好親民；相反陶傑玩膠(唔講其他例子，淨係佢寫英文文章就已經係十級羞恥play)，結果就係「啲on9仔唔識貨」。始終文妓呢個職業真係唔多 respectable，雖然佢稿費叫價甚高，但呢啲「收入」又點同城中事但一個財閥包嘅小老婆相比？香港人冇咩階級觀念，淨係行資本主義，有錢就有品格，而19才子連做雞都做得賤過人，豈不是嗚呼哀哉！

所以講到尾，從外國(哪怕係前宗主國)輸入「普世價值」，真係要打醒十二分精神，小心水土不服。正如偉大嘅共產黨提倡嘅格言：#實踐是檢驗真理的誰一標準，如果你嘗試從外國引進一套新思維，屢試屢敗，咁問題好可能唔係香港人缺乏品味，而係，俾人笑到臉黃都不知羞恥嗰條友。

(原文於 2020 年 11月發佈，略有修輯)