重新欣賞《岳陽樓記》

見網友講《六國論》但冇咩人提《岳陽樓記》。事隔多年，啲抒情類課文我已經唔記得晒，重新睇返，果然係溫故知新。

「滕子京」係邊個嚟？ 佢係作者范仲淹朋友

點解「謫守巴陵郡」？ 啲酸臭文人(同連登仔話女人一定係雞一撚樣咁酸臭)就肯定話咩官場黑暗得罪權貴乜乜柒柒(又，黑暗你又落場做？)，但《宋史》寫得好清楚：

// 御史梁堅劾奏宗諒前在涇州費公錢十六萬貫，及遣中使檢視，乃始至部，日以故事犒賚諸部屬羌，又間以饋遺遊士故人。宗諒恐連逮者眾，因焚其籍以滅姓名。仲淹時參知政事，力救之，止降一官，知虢州。御史中丞王拱辰論奏不已，復徙岳州 //

睇字面意思，就係作者范仲淹老友用公款還舊人情債，俾人查嗰陣仲燒埋本數簿，叫朝庭派人查嗰陣死無對證。睇個款就唔係私吞咗，而係宋軍打西夏失利嗰陣，滕子京自作主張請咗一批羌族同土豪幫手守城，朝庭唔認賬同佢追數。

滕子京老友范仲淹當時仲做緊參知政事(好似係副宰相)，算係好撚高級，大力保住滕子京，等佢只係降職一級。搞出咗咁大單嘢，仲保得住烏砂，算係咁架喇。(如果當時官場有所謂腐敗，咁滕燒完數簿之後仲有得喺岳州起樓先至係腐敗嘅證明⋯)

有趣嘅係，宋朝對待士大夫嘅手段果然係中國史上最文明。朝庭查官員有冇私吞公款，疑犯燒咗本數簿，結論竟然係「不能案」(《涑水記聞》)，真係「無罪推論」同「疑點利益歸被告」呀！( 順便 hashtag #法治 ) 滕子京似乎係戇直嘅人，雖然牌面上佢錯得好緊要，但啲公款唔係私吞咗架喎！使咗啲錢係用嚟保家衛國，避免邊境失守喎！燒數簿係唔想牽連其他無辜嘅人喎！咁都要俾人唱，咪氣忿不平囉。

所以范仲淹寫《岳陽樓記》，可能就係同佢講：睇開啲啦，與其憤慨個人得失，不如諗下點樣幫家國做事好過啦~

不過睇返滕子京呢個人嘅政績，喺涇州就使咗十六萬貫公幣冇交待；喺岳州上任一年就重建咗岳陽樓大白象工程，都真係似係病態使錢狂。 《涑水記聞》話：

// 滕宗諒知岳州，修岳陽樓，不用省庫錢，不斂於民，但榜民間有宿債不肯償者，獻以助官，官為督之。民負債者爭獻之，所得近萬緡，置庫於廳側，自掌之，不設主典案籍。 //

學精咗唔用公幣，用佢進士級嘅 IQ200 諗咗條屎橋濫用公權去做收數佬，聽落都幾變態。不過「州人不以為非，皆稱其能」，又唔係用公數，可能唔算犯規，所以冇御史走嚟煩佢。做咗咁多年官，終於學識咗點樣「斂財」去搞大白象工程，留名青史。

(原文於 2020 年 8 月發佈，略有修輯)