被歧視都要睇資格

當強勢族群歧視弱勢族群，解決方法係要求強者包容弱者。

但係倒返轉，當弱勢族群「歧視」[1]強勢族群，解決方法係要求強者容許弱者融入自己圈子。

要求弱勢族群「包容」強大嘅「他者」，絕對係冇任何理論嘅根據，亦都唔會成功嘅。

睇返香港，究竟「內地人」相對「香港人」係強者定係弱者呢？

若果獨立咁睇香港，暫時平民生活嘅日常仍然係「香港人」佔主流。但大家都知道， #首先我反對港獨，香港絕對唔可以獨立咁去睇，必須以「中國香港」咁樣去睇。我想問，美國黑人可以做總統，香港人有冇機會做國家主席？

然後答案就顯而易見。

所以我不嬲係支持融合嘅：最好就係取消一國兩制，將香港完全融入中國內地體制，完全不分彼此。每一個香港人小朋友都應該可以夢想自己做國家主席，而唔係屈就喺一個小城鎮做個濕鳩市長。呢個理念同 Martin Luther King 相似：處理族群矛盾，必須反對 self-segregation，要求各族群（尤其相對強嘅一方）主動配合群族融合嘅政策，做到「大家都係中國人，不分彼此」。

喺呢個理念之下，嗰啲自稱「港漂」嘅人，仲係咪有資格話香港人「歧視」佢哋，亦都係顯而易見。

我唔係話香港冇歧視問題。事實上香港人係好鍾意「歧視」[1] 其他族群嘅 [2]。呢啲問題當然要正視。但係，你試想像下，如果一個華盛頓首都嘅美國白人走到去黑人社區因為膚色而有唔愉快嘅經歷，佢夠唔夠膽喺國際媒體大力炮轟啲黑人「歧視」[1] 佢呢？答案亦都好明顯。事實上，如果要處理呢個問題，亦都唯有走 Martin Luther King 嘅路線，鼓勵少數族群融入，減少各族群嘅自我隔離。

所以呢，如果唔搞一國一制，而堅持香港唔行「中國特色社會主義」，喺制度上隔離香港人，咁就必然會出現「京城來客屌鳩南方蠻子唔包容」嘅怪事，群族之間亦唔會和諧。到時，香港人唯一出路就只能夠係獨立。

利申：首先我反對港獨。

— — — -

[1] 其實我都唔知呢個詞語可唔可以咁用。 [2] 包括自我歧視，以為白人叻啲；亦包括好多對較深膚色嘅人嘅歧視。

（原文於 2020 年 3月發佈，略有修輯）