《花木蘭其實係跨性別女性》

因為，花木蘭出世嘅時候，其實係男兒身。係。花木蘭係「男人」嚟。

不過佢自細就有性別認同焦慮，平時著女裝，做女性嘅工作，家人亦都當佢係女咁養。

但係，對國家嚟講，木蘭仍然係一個男性，有男性嘅社會責任，責無旁貸。所以一定係木蘭從軍，而唔係佢姐姐。木蘭生理上係男人，當年冇變性手術，男人只要著住男性服裝做男人做嘅嘢，自然就冇人知你有性別認同嘅煩惱。就係咁，一個震驚十三億人嘅真相，解釋咗《木蘭辭》故事嘅兩大疑團。

「雄兔腳撲朔，雌兔眼迷離；雙兔傍地走，安能辨我是雄雌？」

留意返《木蘭辭》最後幾句，其實冇話木蘭係女性，只係用反問語句指出大家分辨唔到。《木蘭辭》雖然大部份篇幅以「女」嚟形容木蘭，可以係因為佢自己認同女性，佢家人亦然，作辭人尊重佢嘅性別認同，唔代表木蘭生理上一定係女。

雖然以上純屬鳩噏，不過我覺得作為一個 interpretation，總好過穿鑿附會話木蘭係個「好man嘅女人」所以十二年都冇人發現云云。

其實呢幾日好多人單憑幾句《木蘭辭》就借題發揮，由國族民族問題，以至男權女權議題，包羅萬有，想像力創作力十分驚人。

⋯ 所以都唔爭在喇。起碼我呢個講法，似乎冇咩漏洞吖。