攞簽證歷險記

睇啲人講 BNO 攞leave outside the rules啲「驚險」嘢，未玩過呢啲遊戲就可能覺得「嘩乜咁都得？」，玩過就知係濕濕碎。

當年本大爺因為要去美帝工作幾個月，受上頭指使要去攞個濕雞working visa (L1，唔係 H1B)，本身大家以為例行公事，點知都一波三折。唔知香港領事係咪做得太少case唔熟書當咗我係另一種visa(H1B)咁處理然後reject咗我嘅申請，驚動到部門director(上司嘅上司嘅上司)捉咗我見移民律師行嘅partner傾應對策略，最後全費送咗我去日本碰運氣搏嗰邊啲領事官冇咁閪(同埋會睇清楚啲例)。

去咗日本大阪兩個星期，人人以為我好爽，但有苦自己知。當時幾撚大壓力，仲慘過真係返工。你諗下，公司出幾萬蚊俾你去日本就只係為咗攞份簽證，攞唔到我豈不是失職？本身報visa都有一大堆嘢要預備同準備，仲要去一個言語不通(我唔識日文)嘅地方去報，根本罷明運吉，臉皮冇返咁上下厚真係唔掂。你知日本人做嘢幾仔細架啦，交份 form 俾個 admin 大嬸(日本人) 睇，佢笑咗出嚟：「喂，小弟弟，你睇你張表？寫錯咗 reference number 喎。乜你哋做嘢咁唔認真架？」（好彩份嘢唔係我整嘅唧，佢心裡面恥笑美帝律師行就唔關我事啦）

之後見領事官，美國白人，操流利日文同我打招呼⋯ 我一句都聽唔明 :0) 唯有同佢講：是咁的我來自香港，我嚟運吉架，講英文就 ok… 耍完一大輪冧之後，佢話一般嚟講運吉(forum shopping)就唔啱嘅，暫時答唔到你批唔批，呢個情況佢要返屋企查下書諗下點算。不過你本護照我keep住先，呵呵。

要知道人在外國，冇咗本護照係咩都做唔到。美領又只係將護照郵寄返俾你，而我嘅郵寄地址係⋯酒店 orz。如果過一排仲未收到，咁點算好呢？使唔使去中國領事報失呢？ T^T 酒店職員收到份嘢係咪會通知我呢？日日就係諗呢啲問題，又唔敢離開酒店太耐(錯過咗通知點算？) 淆足十幾日 (仲要唔係放假架，要工作架)，去到酒店booking臨完兩日終於收到返我自己護照。批咗！耶！(律師行早前提供嘅耍冧訓練終於得到回報喇⋯)

之後攞住份visa入境，偶然會有眼利嘅入境官員問我：咦你香港人點解會有日本領事批嘅簽證嘅？ :0) 我唯有答：係呀嗰陣去咗日本公幹嘛 :0) :0)

講起入境官員，順便講多個無聊故仔：有次去美國出trip，為咗避免入境排長龍，我急急腳行快兩步越過人群，點知條友唔知點解睇我唔順眼，留難咗兩句之後叫我入房(俾其他官)問話。我入到去，房入面班友仔望咗我啲證件之後，叫我坐低，然後佢哋就自說自話：「屌！呢條友[i.e. 我]罷明真係____公司員工嚟啦，做咩送佢入嚟搵嘢嚟做？」 我心諗… 係囉係囉 :0) 最後 dum 咗一大輪先出到去，嗰陣人龍都已經去咗大半。