推己及人

喺公開考試裡面，考生同教師本身就存在嚴重嘅權力不平衡。

考生參與DSE，係以一生前途作賭注。如果考試嘅題目本身喺社會上存在爭議，以致唔同嘅評卷員好可能會以唔同嘅標準或角度去評核答案，咁考生就要「揣摸上意」、「跟從考試潛規則」作答，而唔能夠憑自己意思提出獨立見解，否則就係攞自己嘅前途較飛。

我講嘅呢啲嘢，只不過係每個中學生都聽過嘅基本「考試技巧」。

不過當一班老師被政府批評「政治不正確」嘅時候，忽然間教育界被迫「為咗自己前途揣摸上意」就變成嚴重嘅社會問題。即係話，一班教師掌握住考生嘅前途，用「考試」嘅形式迫學生「揣摸上意」去作答，就算明知考生嘅答案係違心之論，都係冇問題嘅；但政府卻唔可以用教師嘅前途作為要脅，要求佢哋「揣摸上意」唔好咁特立獨行。

成件事真係幾好笑。

唔係話中共插手干預香港教育冇問題。事實上中共同港共係因為對形勢嘅誤判而出手，根本教育制度同內容對香港年青人價值觀嘅影響唔係想像中咁大。朋輩之間嘅影響先至係最緊要 — — 當你個friend俾警察當戰犯咁對待，你會覺得個政府點？ 不過，一班平時以老師(冇引號)姿態指點學生嘅人，被人以其之道還治其人之身嘅時候，原來佢哋都仲唔明白教育本身只係一條人形蜈蚣，食物鏈嘅頂層根本就唔輪到佢哋做。喺資本主義社會，權力嘅來源好簡單，睇錢就得。中小學教育啲錢喺邊度嚟？邊個控制住？

（原文於 2020 年 5月發佈，略有修輯）