喺專制政權之下，研究法律條文仲有冇用？

呢幾年發生咗好多嘢，香港人終於發現「主權」大L晒[1]。國家權力最高機關立嘅法律，理論上係做咩都得。

甚至開始有人話：「唓，#佢 想點都得架嘛，做咩咁認真研究條文呢？」雖然咁講唔錯得晒，起碼好過啲仍然搵緊dead body嘅「法治膠」，但係要小心矯枉過正。若果將一切法律條文完全當作廢話，仍然係與現實不符。

喺專政體制內，法律對政權嘅主要作用，唔係用嚟保障平民百姓嘅利益[2]，而係用嚟規管政權屬下嘅機關、人員。專政者雖然不受法律所限[3]，但政權手下千千萬萬人，雖然嗰啲人代表咗政權某方面，卻唔係政權本身。政權要保證呢啲人聽聽話話，執行主權者意志，就需要用法律去規管佢哋嘅行為。

理論上，只要法律寫得好，準確表達出專政者嘅意願，任何人以政權之名作出越權行為都係違反專政者嘅意思，政權有動機同理由去制止同懲罰呢啲越權行為。

當然啦，理論還理論，實際還實際。至於啲理論有幾實際，啲法律條文係咪準確反映專政者意願，反映咗啲咩意願，咁最後都要睇條文去判定架 :0)

所以，係咁嘅原因，睇法律條文唔係冇用架。不過你睇唔睇得明，就另一回事 :0)

按：我先唔係為咗保住我嘅「無牌法律KOL」嘅地位先咁講呀~

— —

• [1] 某啲不法份子鼓吹「獨立」，某程度上都係出自對呢種不受限制嘅權力嘅嚮往。利申 #首先我反對港獨
• [2] 當然可以係良性嘅「副作用」
• [3] https://en.wikipedia.org/wiki/Sovereign_immunity

(原文於 2020 年 7 月發佈，略有修輯)