反對港獨，反對一國兩制

種族分離政策曾經係美國白人對黑人歧視嘅手段，所以美國黑人民權運動係提倡融合嘅。

佢哋唔會話因為美國白人仆街，所以要打倒整個白人體制，或者從白人社區分割出去，自立王國。相反，佢哋爭取加入白人主導嘅社群同組織，甚至爭取黑人做議員、做法官、做總統。(另一種角度講就係同白人「同流合污」，哈哈)

香港人一窩蜂咁為美國BLM運動表態嘅時候，唔知有冇留意到呢點。

越嚟越多香港人明白 #一國兩制 既然係 #五十年不變，自然係保留英國殖民制度，中國承傳呢啲制度，目的不言而喻。從實際角度出發，「港獨」喺可見將來係難以實行嘅，喺 globalization 趨勢下，分離主義係逆著歷史大流[0]。當美好嘅理想缺乏實質物理嘅支撐，如果認真去搞[1]，相信禍害不小。所以我嘅口頭禪 #首先我反對港獨 唔係玩膠之說，而係認真嘅。

雖然「港獨」係偽命題，不過「一國兩制」卻係貨真價實會整死香港嘅嘢嚟。今日(6月26) 國是學會 嚴詞指出「一國兩制就是要將香港變成疆藏」，我好同意。呢一點係香港社會賢達一直迴避嘅 inconvenient truth。打擊「一國兩制」係刻不容緩嘅事，喺呢一點上我同獨派嘅見解略同。

如果唔要「一國兩制」又唔搞「港獨」，難道真係「一國一制」融入中國？呢樣嘢之所以駭人聽聞，係因為西方勢力從來冇人想呢樣嘢發生，而香港人未 #光復自己 之前又好少認真為自己著想。趁住大家仲留意美國BLM運動嘅時候，我想再次指出，融合未必係一個壞嘅選項。美國黑人運動呢幾十年嚟取得相當成果[2]，全靠「融合」二字。你今日唔相信香港人可以做到中國國家主席，就等於幾十年前美國都冇人相信一個黑人可以做到總統。

當然，獨派鍾意繼續搞「港獨」，作為「首先反對港獨」嘅我又唔會刻意做啲咩阻礙佢哋。始終黨同國家已經開始處理緊港獨問題，何必我呢粒小微塵去操心。(你班仆街小心睇路呀，咪話我冇當你哋係朋友。)

— -

• [0] 望下英國獨立運動 (i.e. Brexit) 搞成點就知道就算喺文明國度搞獨立都可以極度損手爛腳
• [1] 不過而家啲港獨派唔係好夠認真 (或者準確啲講係唔係好夠力量)，仍然主要喺琢磨論述階段。
• {2] 當然佢哋係「同志仍需努力」。或者如果佢哋好似以色列咁劃個州出嚟，淨係俾非裔美國人去住，變成一個由黑人主導嘅獨立國家，真係會好啲呢？ 但歷史冇如果。

（原文於 2020 年 6 月發佈，略有修輯）