點解反送中遊行有幾十萬人，六四晚會就只得十幾萬？

早幾年，本土派質疑支聯會每年悼念「六四」是否失去意義，與香港本土議題脫節。有人批評本土派與中國切割、獨善其身，乃係大逆不道，妖言惑眾。

隨便喺網上搵下，就會見到好多篇文章報道批評呢種「獨善其身」嘅思維。例如 2015 年程翔嘅訪問：「程翔又不贊同本土派「關門主義」的做法，認為香港能獨善其身根本是個迷思，而是應打從一開始，要認知到對手只有一個，而在博奕中孤立自己，並不能因而得勝，而中共本身，在過去亦吃盡「鎖國」的苦果。」[1]

又例如 2018 年社民運就發表咗以長毛署名嘅文章，最後言詞慷慨：「以為香港可以獨善其身，自囿於中國民眾抗爭之外，顯然是不切實際的幻想，香港威權政治愈益猖狂，打壓異己，又何嘗不是中共與本土附庸結黨營私的必然結果﹖雙手沾滿血污的屠夫政權作惡，又豈會以深圳河為界？」[2]

又例如鄧小樺女士喺獨媒嘅文章：「作為抗爭者，一般是主動與其它被壓迫者連結，共同對抗強權，獨善其身在國際抗爭運動史上都會被遺憾的。作為思考香港前路的人，應知香港彈丸小地，倘若孤絕鎖閉，必被中共壓至粉身碎骨。」[3]

根據呢啲社運界先賢，「獨善其身」確實係大逆不道嘅。

不過香港人身體係誠實嘅。

2019 年 6 月初，香港有一場大型集會，亦有一個大型遊行。「六四」集會嘅主題係愛國嘅，係為咗悼念一班為國家民主化理念而犧牲嘅人；相反，「反送中」遊行係自私嘅，係意圖以「一國兩制」嘅名義，同中國司法制度割𥱊，務求獨善其身。

今年「六四」集會人數相對往年比較多，號稱有十幾萬人；但「反送中」遊行人數明顯比佢再多出好幾倍，起碼都幾十萬。

點解？

點解呀？

點解嘅？

我敢講，「本土派」對於「六四」嘅講法，先至係「貼地」，先至係大眾市民嘅心底話。香港大眾唔係要救中國十三億人民於水深火熱之中，只係想「獨善其身」希望中共唔好踏過深圳河咋。呢呢觀點，唔係「本土派」閉門造車發明，然後推廣嘅。呢啲觀點，係好多香港人用行動表明嘅立場。

如果你唔順超，不妨質問啲有去「反送中」遊行嘅人，點解唔去「六四」晚會。我想知呢啲冇去六四晚會嘅大眾市民係咪冇人性、係咪政治冷感、係咪被中共洗腦，甚至係咪白痴港豬？

或者只有喺中國(i.e. 香港)，反映人民意見會被人屌到上天花板。如果人民係神聖嘅，又何來本土派大逆不道之說？

我覺得我作為「本土派」嘅一員，咁樣評論或者有失公正。所以我都好想啲大正無私嘅泛民政客同評論員解釋下點解兩個活動人數差咁遠，點解咁多香港人比較鍾意「獨善其身」，究竟係咪中間出咗啲咩問題。

泛民自 high 之前，不妨諗諗今次「反送中」遊行人數咁多，係代表咗啲乜嘢。

利申：我冇去「反送中」遊行。我一直堅持愛國愛黨立場，支持香港 #法治回歸，力撐中央政府大力推行陽光司法！最後我都要講返句：#首先我反對港獨。多謝大家。