重新學習「愚公移山精神」

《愚公移山》嘅寓言故事，大家細細個聽得多。但究竟你有冇真正明白佢嘅寓意呢？本老師[1]今日就兜口兜面同大家解釋清楚。

【成本有限，效益無限】

有人話《愚公移山》嘅寓意在於要「不畏艱難」。但問題係：世界上咁多困難嘅嘢可以挑戰，點解偏偏要玩移山呢？

故事入面，太形、王屋兩座山阻住晒，令村民要繞道而行。如果移走座山，交通方便，有利經濟發展，大家發大財。移山嘅成本係高，但始終有限。座山移走咗，惠澤後世千萬年，效益係無限嘅[2]。只要你俾得起高昂嘅成本，你就有無限嘅回報。所以點解要移山？唔係因為「難」，而係因為有無限回報公益項目，係「值得做」。

【團結就是力量，功成不必在我】

又有好多人覺得，某個項目係我開始做嘅，明明我做得最好，點解要交俾其他人參與？但係，只要你目標夠遠大，你就會發現自己相對好渺小。如果唔集合更多人嘅力量，好可能完成唔到。所以愚公呢個移山大工程，唔單止係自己子孫加入，連鄰居個仔都走嚟幫手。[3]

「人多好辦事」似乎係常識。但現實裡面，項目負責人嘅人如果心胸稍為狹窄，或者有控制狂傾向，驚啲「外人」加入會搞亂佈局，就好可能採取一啲排拒外人嘅態度。

近年興講 “crowd source”，究竟點樣先可以動員到群眾一齊為項目奮鬥，當中大有學問。(⋯ 呢啲嘢，遲啲得閒再講。)

【相比個人堅持，後世傳承更重要】

團結係唔夠嘅。Crowd source 有時都係唔夠嘅。一個世代做到嘅嘢始終有限。所以愚公要為此問題提出解決方案：靠後世子子孫孫。「靠子孫」唔係隨口亂噏嘅。故事裡面，愚公提出移山，最後全家人都贊成，證明佢受到後輩尊敬。所以佢話子孫會繼承佢嘅遺志，係有事實根據嘅，係確實可行嘅。

人類史上所有偉大嘅創舉，都唔係靠一小撮人或一個世代去完成，而係經過長年嘅累積，經過好多代嘅傳承同改良，然後得到成果。好多人話《愚公移山》嘅寓意係「堅持」，但其實除咗自己要堅持之外，大家仲要將呢份堅持傳承後世，先至可以成就偉大嘅創舉。如果你好似愚公咁，去到九十歲仍然有一呼百應嘅號召力，可以叫得郁後代為你定立嘅目標而奮鬥，咁世上真係唔係好多嘢可以難得到你[4]。

【練習題】

希望大家唔好睇完呢篇文過咗癮就算。我哋身處嘅社會，樣樣但求速成，同時群眾又似乎希望社會改變、改革。好多嘢，唔係一朝一夕就可以改變，甚至唔係靠一個世代就可以改變得到。喺咁嘅時代背景之下，大家能否實踐「愚公移山精神」就係各個偉大工程能否成功嘅關鍵要素。

單靠「一鼓作氣」完成唔到嘅嘢，就要退後幾步，考慮下長遠嘅策劃，搵返啲「值得做」嘅項目，堅持返幾個世代。如果真係做得到呢樣嘢嘅話，我相信世界嘅面貌，會有一番新景象。

希望大家好好實踐「愚公移山精神」。呢個就係我俾大家嘅功課~

… 好喇我扮完老師喇 :0) 記住唔好叫我做「老師」 :0)

— -

（原文於 2019 年 12 月發佈，略有修輯）